Ўзбекистоннинг биринчи рақамли теннисчиси Денис Истоминнинг фаолияти давомида ишлаб топган мукофот пуллари 5 038 510 $ га етди.

ATP World Tour сайти хабарига кўра, 12 йилдан бери мусобақаларда иштирок этаётган Истоминнинг йиллик ўртача даромади 420 728 $ни ташкил қилади.

Энг кўп даромад олган теннисчилар рўйхатини швейцариялик Рожер Федерер бошқариб турибди. У фаолияти орқали 107 309 145 $ ишлаб топган. Йиллик ўртача кўрсаткич - 8 478 320 $ га тенг.

Ундан кейинги ўринларни Рафаэль Надаль ( фаолияти давомида 86 111 479 $, йилига 7 386 870 $) ва Стэн Вавринка (фаолияти давомида 30 623 544 $, йилига 2 818 912 $) лар эгаллаб турибди.

Эслатиб ўтамиз, Денис Истомин фаолияти давомида якка баҳсларда бир марта ATP турнирида ғалаба қозонган (2015 й. Ноттингем). Жуфтлик баҳсларида эса учта ғалабага эга (2013 – Москва, 2014 – Монпелье, 2015 – Гштаад).