Олий лига 16-туридан ўрин олган “Динамо” – “Металлург” (0:3) ўйинидан кейин меҳмонлар бош мураббийи Рустам Мирсодиқов ўз фикрларини айтди.

"Ўйин “Металлург”нинг катта устунлиги остида ўтди. Биз рақибнинг ўйинларини яхшилаб ўргангандик. Шунга яраша тактика танладик. Бу эса ўз самарасини берди. Тўғриси майдон эгаларидан ҳужумкор футбол кутгандик. Аммо уларнинг беш нафар ҳимоячи билан чиққанлиги бизнинг “юмушимизни” осонлаштирди. Шу ўринда биз майдон эгаларининг иккинчи ролдаги ўйинига ҳам тайёрлангандик. Кўрсатмаларни аниқ бажарганликлари ва чиройли ғалаба учун барча йигитларга катта раҳмат. Фақат Жавоҳир Эсонқуловнинг жиддий жароҳат олгани яхши бўлмади, оёғига гипс қўйдирдик" - деди Мирсодиқов.