АҚШ Молия вазирлиги Мексика терма жамоаси футболчиси Рафаэл Маркесга нисбатан санкция эълон қилди.
38 ёшли футболчи гиёҳванд моддаларнинг ноқонуний савдоси билан шуғулланувчи шахслар, хусусан наркобарон Флорес Эрнандес билан алоқа қилганликда гумонланмоқда.
АҚШ Молия вазирлиги маълумотига кўра, Маркес уюшган гуруҳнинг жиноятларини яширишда ёрдам берган, ўз номидан банкларда ҳисоб рақамларини очиб, наркобизнес вакиллари пулларини ўтказган.
Айни пайтда унинг АҚШ банкларидаги ҳисоб рақамлари музлатилган, визаси ҳам бекор қилинган.
Эслатиб ўтамиз, Рафаэл Маркес Мексика терма жамоасига тўртта жаҳон чемпионатида сардорлик қилган. У терма жамоа сафидаги ўйинлар сони бўйича рекордчи ҳисобланади.
Футболчи фаолияти давомида "Барселона", "Монако", "Нью-Йорк Ред Буллз" клубларида ўйнаган. 2016 йилдан бери Мексиканинг "Атлас" клубида тўп суриб келмоқда.
