Бир йилдан сал кўпроқ вақт ичида Криштиану Роналду икки марта ЕЧЛда ғолиб бўлди. Евро-2016, Испания Ла-лигаси ва клублар ўртасидаги ЖЧнинг олтин медалларини қўлга киритди.
Охир-оқибат «Олтин тўп»ни ўз коллекциясига қўшиб қўйди. Ана шу муваффақиятларнинг барчасига CR-7 ўзининг спорт дастурига тегишли ўзгаришлар киритиш орқали эришди.
Жумладан, овқатланишдаги зарарли одатлардан воз кечиб, қатъий парҳезга амал қиладиган бўлди.
Ҳужумчи Мадридга келган пайт «Реал» бош директори Хорхе Вальдано шундай деганди: «Кимки машғулотларда астойдил тер тўкиб, ўз саломатлигини назорат қилмас экан, ҳеч қачон Роналдуникидек тана тузилишига эга бўлолмайди». Фаолиятидаги иккинчи ЕЧЛ кубогини қўлга киритган мавсумда устозлик қилган Карло Анчелоттини эса шогирдининг спиртли ичимликларни умуман истеъмол қилмаслиги лол қолдирганди.
Роналду шунингдек, шоколад ва газли сувга ҳам тоқат қила олмайди. Одатда, кўпчилик футболчилар ўйиндан кейин ўзларига бироз эрк беришни ёқтиришади. Масалан, «Валенсия» аъзоси Дани Парехо «Фанта»нинг шайдоси. Роналду эса бундай лаззатланишларга йўл қўймайди. Айтишича, ортиқча вазнни ёқтирмайди, озғинлик учун ирсий хусусиятларидан миннатдор, озиқ-овқат маҳсулотларини танлашда ўта талабчан.
Қатъий парҳезга риоя қилиш португалиялик ҳужумчига доимо талаб даржасидаги спорт формасида бўлиш имкониятини беради. Мушаклар салмоғини ошириш ёки аксинча, вазнни камайтириш учун мутахассислар футболчига махсус дастурлар тайёрлашади: машғулотлар, залда индивидуал тарзда машқ қилиш, дам олиш ва овқатланиш режимларига қатъий амал қилиш. Криштиану арзимас икир-чикирларга ҳам катта аҳамият беради.
2015 йили суратга олинган «Роналду» фильми ҳужумчининг оилавий нонуштаси билан бошланади. Кенг стол атрофидан жой олган ота-бола қаршисида уч шиша сув турибди. Отаси апельсин меваларини майдалаш билан овора, ўғлининг олдида ҳам сариқ рангдаги шарбат. Мактаб ва машғулотлар тугаган оқшом пайтида футболчи ўғлига сут таклиф этади, худди отасидек кучли бўлиш учун.
Роналдулар оиласи билан яқиндан танишиш имконини берадиган картинада Роналдунинг қандай маҳсулотларни истеъмол қилиши ҳақида маълумотлар йўқ. Стол устида қандайдир ликопчалар бор. Аммо улар ичидаги таомларни кўриш иложсиз. Интернетда Роналдунинг парҳезларидан фойдаланишни тавсия этишади, испаниялик видеоблогерлар шарҳларини ёритадилар.
Боиси, CR-7га ўхшашни истайдиганларнинг сон-саноғи йўқ. 32га чиққан футболчи маҳоратининг очилмаган қирраларини кашф этишдан кўра фаолиятини якунлашга яқинроқ эканлиги ўз-ўзидан маълум. Шу сабабли ҳужумчи иложи борича узоқроқ тўп суриш йўлларини қидиради, жисмоний тайёргарлик жараёнига тегишли ўзгаришлар киритади.
Айнан шу изланишлар эвазига Роналду 2016|2017 йиллар мавсумининг якуний босқичини шидатли ўтказди: ЕЧЛнинг чорак финалидан сўнг 10та гол ва Буффон дарвозасига йўллаган олтин «дубль».
30дан ўтгач, Криштиану вазн ташлаш йўлларини излай бошлади ва ҳар йили туғилган кунини бир килограммга енгилроқ ҳолда нишонлашга одатланди. Тиғиз давр ортда қолгач, мушаклар салмоғини пасайтириш зарурати пайдо бўлди. Акс ҳолда, футболдаги кексайиш жараёнини секинлатиш, асосий устунлиги бўлган тезлик ва тезкорликни сақлаб қолишнинг иложи бўлмасди.
Тўғри овқатланиш, аниқ режаларга асосланган юкламалар ҳамда тикланиш жараёни ва албатта, қатъий парҳезга тўлиқ риоя қилиш. «Соғлом парҳезга амал қилиш - футбол ўйинининг асоси! Ўзига мақбул келадиган ёнилғини топа олмаган футболчи ҳеч қачон маҳоратини 100 фоиз намойиш этолмайди», - дейди Роналду.
Энг мақбул «ёнилғи» рецептига эга бўлиш учун Криш узоқ изланди. «МЮ»далик пайти айрим зарарли иллатлардан холи эмасди. Оқибатда парҳезга ўтишга мажбур бўлди. Айни дамда қайси таомдан қандай миқдорда истеъмол қилиш кераклигини яхши билади.
Роналдунинг овқатланишдаги асосий принциплари
У ҳар куни 3000 калорияли таом истеъмол қилади. Асосан балиқ, денгиз маҳсулотлари ва сабзавотлардан иборат. Таомларни пишириш усули - буғда ёки духовкада тайёрлаш. Криштиану дорадо, денгиз олабуғаси ва онаси тайёрлайдиган португалча бакалаони яхши кўради.
«Бакалао Роналдунинг севимли таоми. Уни ҳар куни ейиш мумкин эмас. Чунки у 500 калорияга эга. Бундан футболчининг онаси ҳам яхши хабардор», - дейди Португалия терма жамоасининг ошпази Элио Лоурейро.
Балиқ таомларини одатда помидор салати билан истеъмол қилади. У туғилиб ўсган Мазейрадаги тропик мевалар ҳам парҳезбоп. Унинг таомномасида қуюқлаштирувчи қўшимчалар ва гарнирлар йўқ.
Роналду маҳсулотларни соф ҳолда ейишни ёқтиради. Севимли кечки таоми - нўхат қўшилган сабзили гуруч. Бу озуқа углевод, калий, фосфор, темир, селен моддалари ва «А» витаминига бой. У мушаклар толиқишини бартараф этади, суякларни мустаҳкамлайди. Брокколи эса антиоксидантлар ва организмдан зарарли моддаларни чиқариб юборади. Товуқ гўштида оқсил мўл. Бананда магний кўп бўлгани учун томир тортишишининг олдини олади.
Роналду сувни кўп ичади, тушдан кейинги енгил овқатланиш пайти нок, апельсин, ананас, олма, ҳатто лимондан тайёрланган шарбатлар билан озиқланади. Шароб камдан-кам ҳолларда ичадиган ичимлик.
Боз устига, «Реал» аъзолари ўртасида шундай ҳикмат бор: «Кўзалар (кубоклар) ичиш учун эмас, ютиб олиш учун тайёрланган». Криштианунинг отаси ичкилик туфайли ёруғ дунёни 57 ёшида тарк этган. Акаси Уго эса узоқ вақт наркотик моддалар чангалидан чиқиш учун курашди. «Агар Роналду футболни танламаганида худди акаси каби гиёҳванд бўлиб қоларди.
Хайриятки, у спортдан воз кечмади. Шу сабабли спиртли ичимликларни оғзига олмайди», - дейди онаси. Айтганча, Мадрид ва Мадейра оралиғида қатнаб яшаётган Долорес хоним ўғлининг тўғри овқатланишида яқиндан ёрдам беради.
Дуч келган ерда овқатланишни ёқтирмайди - уйида ёки «Реал» базасида тамадди қилади. Шу сабабли унинг ресторанлардаги суратларида ликопчалар кўпинча бўш ёки камтарона таомлар билан банд.
Футболчининг овқатланиш тартибида бир қатор қоидалар мавжуд: таом истеъмол қилиш орасидаги вақт бир неча соатдан иборат. Шунда тановвул қилинган овқатнинг қувватидан машғулотларда унумли фойдаланиш ва метаболизм таъсирини назорат қилиш имконияти пайдо бўлади.
Нонушта: «Одатда, бошоқли экинлар, мевалар ва нон билан чекланаман. Ичимлик сифатида сув билан шарбатлардан фойдаланаман. Мевалар - банан, қулупнай, олма ва манго шарбатини аралаштириб, тажриба ўтказишни ёқтираман». Шунингдек, Роналду балиқни севгани учун баъзан нонуштада ҳам истеъмол қилади.
Британиялик етакчи диетолог Мэрилин Гленвиль Роналдунинг нонуштасига қуйидагича баҳо берди: «Донли экинлар қайта ишланган ширин углеводлардан фойдалироқ.
Масалан, нон ёки шунга ўхшаш пишириқлардан. Донда фойдали тўқималар миқдори кўп. Мева шарбатини сув билан бир хил нисбатда ичиш фойдали». Қўшимчалардан Роналду протеин коктейли ва мультивитаминларни хуш кўради.
Ирина Шейк билан ажрашиб кетганлиги португалиялик футболчининг парҳезга риоя қилишига ижобий таъсир этди - хоним фастфут, турли хамир таомлар, конфет ва кремларни яхши кўрарди.
