Эрнесто Валверде келганида бошида “Барселона”нинг тактикаси ўзгарар деб ўйлагандик. Бироқ суперкубокни кўрдиг-у, Валверде ҳам Каталония клубининг қон-қонига сингиб кетган тактикани бузиб ташлай олмаслигини англадик. Хўш, “Барселона” нега ютқазди? Келинг, мағлубият сабабларини излаб кўрамиз.
НЕЙМАРНИНГ ЙЎҚЛИГИ
Бу аниқ эди. Чунки айни дамда Неймарнинг ўрнини босадиган футболчи нафақат “Барселона”да, балки бошқа жамоаларда ҳам йўқ. Валверде Неймарнинг ўрнини Англияда тажриба орттириб келган Делафеу билан тўлдирмоқчи бўлди, бироқ у деярли кўзга ташлангани йўқ. Неймарнинг олдинги эл класиколардаги ўйинларини эсланг. Бугунги ўйинда “Барселона”га Неймарнинг ажойиб финтларию заргарона узатмалари камлик қилди.
ЭСКИРГАН ТАКТИКА
Ўйин давомида “Барселона” устунлик қилди. Одатдагидек. Тўп билан муомала қилиш, бурчак тўплари ва ҳоказо. Аммо аниқ зарбалару хавфли вазиятлар борасида унчалик устунлик қайд этгани йўқ. Валверде “Реал”ни тўпсиз қолдириш кераклигини уқтирибди-ю, аммо рақиб дарвозасини ишғол этишни ўргатмабди, шекилли. Биргина гол ҳам Суареснинг айёрона актёрлиги натижасида ишланган пеналтидан киритилди. “Барселона” ҳамон эскирган тактикасининг жабрини тортяпти — устунлик бор, натижа йўқ. Афтидан, Гвардиола тики-такасини жамоанинг қон-қонига сингитиб юборган кўринади.
ВАЛВЕРДЕНИНГ ЭЪТИБОРСИЗЛИГИ
“Реал”нинг асосий қуроли — қарши ҳужум. Буни Валверденинг билмаслиги мумкин эмас. Ахир унинг ўзи Мадрид жамоаси билан илгари ҳам тўқнаш келган. Қолаверса, класикодан олдин “Реал”нинг ўйинларини кузатган бўлиши керак. “Реал”нинг иккита голи қарши ҳужумдан киритилди. Бу эса Валвердега муносиб жазо бўлди, у қарши ҳужумга қарши қурол тайёрлаб қўймагани учун жазоланди.
ОМАДСИЗЛИК
Ҳа, “Барселона”нинг мағлубиятига омадсизлик, аниқроғИ, “Реал”нинг омади келгани ҳам сабаб бўлди. Айниқса, Асенсионинг супер голи кўрсатдики, бугун “Барселона”нинг куни эмасди. Класикога ҳар томонлама яхши тайёрланган “Барса”нинг оёғига омадсизлиги ҳам тушов бўлгани аниқ.
МАЖБУРИЙ ТАНЛОВЛАР
“Барселона” таркиби ҳозир у қадар кучли эмас, боиси эл класикода майдонга тушган айрим футболчиларни бу ўйинга тайёр деб бўлмайди. Бизнингча, агар яхшироқ варианти бўлганида Валверде Неймарнинг ўрнига Делафеони туширмасди. Тўғри, Жерар тажрибали футболчи, аммо унинг тажрибаси эл класикода ўйнаш учун, барибир, камлик қилади. Заҳирадан туширилган футболчилар ҳам “Барселона” даражасида эмасди.
Жавоб ўйинида “Барселона”га қийин бўлиши тайин. Тўғри, Каталония клуби “Реал”ни йирик ҳисобларда ютган, аммо ҳозирги “Барселона” ўша пайтдаги “Барселона” эмас, шунингдек, “Реал” ҳам. Тўғри, жавоб ўйинида ҳакам томонидан ноҳақ четлатилган Роналду майдонга туша олмайди. Аммо Зидан унинг ўрнини босадиган футболчи топиб қўйган. Бу Асенсио, бу Васкес ёки бошқа бир футболчи. Кўрамиз жавоб ўйини қандай бўларкин? Айтганча, умид қиламизки, кейинги ўйинни нима қилаётганини биладиган ва футболни яхшироқ тушунадиган ҳакам бошқаради.
Низомжон ИСЛОМОВ
