«Реал» ҳужумчиси Криштиану Роналду «Барселона» дарвозасига гол урганидан кейин каталонияликлар форварди Лионель Мессининг гол нишонлаш услубини такрорлади.
Испания суперкубоги доирасида «Камп Ноу»да бўлиб ўтган дастлабки учрашувнинг 80-дақиқасида португалиялик футболчи чиройли зарба билан Тер Штеген қўриқлаётган дарвозани ишғол қилди ва шундан сўнг футболкасини ечиб, ўз фамилиясини стадионга намойиш қилди.
"Барса" ҳужумчиси Лионель Месси ўтган мавсумда Ла лиганинг 33-тури доирасида «Сантьяго Бернабеу»да бўлиб ўтган ўйиннинг сўнгги дақиқаларида "Реал" дарвозасига гол уриб, худди шундай ишни амалга оширганди.
Сариқ карточка билан якунланган бу гол нишонлаш Роналдуга қимматга тушди. Орадан 2 дақиқа ўтиб ҳакам унинг навбатдаги ҳаркатини симуляция сифатида баҳолаб, Криштиануни майдондан четлатди. Энди португалиялик футболчи Испания суперкубогининг жавоб ўйинида иштирок эта олмайди.
