УЕФА ташкилоти Неймарнинг "Барселона"дан ПСЖ клубига ўтганидан сўнг, молиявий fair play қоидаларини ўзгартиришни режалаштирмоқда.

Бу ҳақда «Лион» клуби президенти Жан-Мишель Оляс хабар берган.

«Ҳамма, айниқса катта клублар бу хавфни тушуниб турибди. Неймар "Барселона"нинг розилигисиз "ПСЖ" клубига ўтиб кетди. Бу жуда ёқимсиз воқеадир.

Энди УЕФА молиявий fair play қоидаларини қайтадан ишлаб чиқиш масаласини кўриб чиқмоқда. Ташкилот Неймарнинг ўзи «Барселона»дан 222 млн евро эвазига шартномасини сотиб олганидан сўнг, бу борада ўзгаришлар қилиш лозимлигини тушуниб етган.

Неймарнинг «ПСЖ»га кўчиб ўтишидан сўнг, УЕФА молиявий fair playнинг янгича тартибини ишлаб чиқишга қарор қилди. Биз клублар ўз ҳаддини билиши керак деб ҳисоблаймиз.

«Манчестер Сити» ҳам худди «ПСЖ» каби йўл тутишни кўзлаб юрибди. Футбол БАА ва Қатар ўртасидаги ўзаро кураш ва бошқалар амал қиладиган қоидаларга бўлиниб қолмаслиги лозим», - деди Оляс.

Маълумот учун, «Лион» президенти Европа клублар Ассоциациясининг ижроқўми аъзоси саналади ва бевосита УЕФА ишлаб чиқадиган қоидалар ва янгича тартиблардан хабардор бўлиб туради.