«Реал» ҳужумчиси Криштиану Роналду Испания спорт арбитраж судининг футболчига нисбатан 5та ўйиндан иборат дисквалификацияни ўз кучида қолдириш ҳақидаги қарорига ўз муносабатини билдириб ўтди.
«Яна бир йўл қўйиб бўлмас қарор. Адолатсизлик ҳеч қачон мени издан чиқара олмайди. Ҳар доимгидек мен янада кучлироқ бўлиб қайтаман. Мени қўллаб-қувватлаган барчага раҳмат», – дея ёзди Роналду ўзининг твиттердаги саҳифасида.
Эслатиб ўтамиз, 32 ёшли футболчи Испания суперкубоги доирасида «Барселона»га қарши дастлабки ўйинда (3:1) четлатишдан кейин ҳакам Рикардо Бенгоэчеани туртганди. Шу боис, у 5та ўйинга дисквалификация қилинди.
Португалиялик футболчи Испания суперкубоги доирасида «Барселона»га қарши жавоб ўйини (2:0) ва Ла лиганинг 1-тури доирасида «Депортиво»га қарши (3:0) баҳсни ўтказиб юборди. Роналду «Валенсия», «Леванте» ва «Реала Сосьедад»га қарши навбатдаги учрашувларда ҳам майдонга тушмайди.