Борнмут шаҳри полицияси "Манчестер Сити" ҳужумчиси Серхио Агуэро устидан берилган шикоят бўйича терговни бошлади.
Гап шундаки, "Борнмут" - "Манчестер Сити" (2:1) ўйини вақтида Серхио Агуэро стадиондаги стюардлардан бирини урган. Жанжал "Дин Корт" стадионида, меҳмонлар яримҳимоячиси Раҳим Стерлинг ғалаба тўпини киритган вақтда келиб чиққан.
Стерлинг жамоадошлари билан бирга мухлислар олдига голни нишонлаш учун келган. Бунинг натижасида Стерлинг иккинчи сариқ карточкага муносиб кўрилиб, майдонни тарк этган. Бир неча мухлислар стадионга югуриб тушиб, стюардлар уларга қарши куч ишлатишга мажбур бўлган. Шунингдек стюардлардан бири ўзини Серхио Агуэро урганини даъво қилган. Аммо аргентиналик ҳужумчи бу даъвони рад этмоқда.
Полиция айни вақтда видеоёзувни диққат билан ўрганмоқда.
