Ўзбекистон миллий терма жамоаси футболчилари Жанубий Кореяга қарши ЖЧ—2018 саралаш учрашувидан сўнг журналистлар билан мулоқот майдони — микст-зонадан ўтмади. Бу ҳақда ўйин ўтказилган «Бунёдкор» стадионида ҳозир бўлган журналистлар маълум қилди.

«Журналистлар бир соатдан буён Ўзбекистон термаси аъзолари, мураббийлар штабини кутмоқда. Улар эса ҳали ҳам кийиниш хонасида, қамалиб олган», — деб Twitter’даги саҳифасида хабар қолдирган «Offside» нашри.

«Футболчилар микст-зонадан ўтмади. Уларни бир ярим соат кутган журналистлар олдига чиқмади. ‘Орқа эшикдан автобусга чиқиб кетишяпти», — деб ёзган Twitter’даги тахаллуси @Shef_uz бўлган журналист.

Аввалроқ Ўзбекистон миллий терма жамоаси бош мураббийи матбуот анжуманини журналистларнинг саволларига жавоб бермай тарк этгани, журналистлар уни «Позор!» («Шарманда!») деб кузатиб қўйгани ҳақида хабар берилган эди.

Эслатиб ўтамиз, Ўзбекистон миллий терма жамоаси 5 сентябрь куни Жанубий Кореяга қарши ЖЧ—2018 саралаш учрашувида 0:0 ҳисобида дуранг ўйнади.

Мазкур натижа мундиал йўлланмаси учун курашни давом эттириш учун камлик қилди — параллел ўтган учрашувда Эрон билан 2:2 ҳисобида дуранг ўйнаган Сурия Ўзбекистонни гуруҳда 4-ўринга тушириб юборди.