Бугун Ўзбекистон футбол федерациясида ҳисобот-сайлов конференцияси ўтказилди.
Конференция якунида ЎФФнинг собиқ президенти Мираброр Усмонов ҳам сўзга чиқиб, сўнгги йилларда олиб борилган ишлар, бўлиб ўтган камчиликлар борасида тўхталиб, янги раҳбариятнинг ишига омад тилади.
“Бундай учрашувлар кам бўлади. Ҳозир футбол ўсаётгани ҳақида кўп гаплар бўлди. Аммо камчиликлар ҳақида ҳеч ким ҳеч нарса демади.
Аввало мени ЎФФ раҳбарлигига таклиф этишганига мана 12 йил бўлди. Қурилган стадионлар, шарт шароитлар, буларнинг барчаси менинг хизматим эмас.
Бу аввало Ўзбекистон Республикаси биринчи Президенти Ислом Каримов ва ўша вақтларда Бош Вазир лавозимида бўлган Шавкат Мирзиёев жанобларининг хизматлари ҳисобланади.
Лавозимига келганимда айтгандим: “Мендан ҳеч нарса кутманглар. Мендан жаҳон чемпионатига олиб чиқишни сўраманглар. Буни ваъда бера олмайман.
Саккиз, ўн йилдан сўнг жаҳон чемпионатига чиқиб, нимадир кўрсатишимиз мумкин. Бизда пойдевор йўқ”, дегандим.
“Ҳукуматимиз спортга катта эътибор қаратмоқда. Энди спортчиларимиз ғолиб чиқса, бир умр маош олади. Осиёда кимга шундай шароит яратиб берилмоқда?
Бизнинг мақсадимиз нима? Чўққиларга чиқиш ҳали насиб этади. Ҳозирги мақсадимиз эса - соғлом авлод қолдириш. Агар ўзимиздан соғлом авлод қолдирсак, Давлатимиз келажаги ҳам порлоқ бўлади.
Мана ЎФФга янги раҳбар сайланди. Уларга катта омад тилайман. Дуо қиламиз, ўз олдига қўйилган мақсадга эришсин. Янги раҳбариятга маслаҳатим - ҳеч қачон танқиддан қочманглар. Ишламаган одамни биров эсга ҳам олмайди, танқид ҳам қилмайди.
Аммо танқид ҳам ҳар хил бўлади. Юзта танқид бўлса, шундан 20 таси тўғри бўлади. Мана шу ерда журналистларимиз ҳам ўтирибди.
Улар вақтида бизни тергаб туришди, ўз фикрларини беришди. Биз эса уларни эътиборга олдик. Демак спортнинг ривожланишида журналистлар ва мухлисларнинг ҳам катта хизмати бор. Шунинг учун танқид яхши нарса. Ундан қочмаслик ва унга эътибор бериш керак.
Албатта ҳар бир одамнинг ўзига яраша армони бўлади. Мен ҳам бир армон билан кетяпман. Шу жаҳон чемпионатига чиқсак ҳам ёмон бўлмас эди.
Ўйлайманки кейинги 4 йилда албатта Ўзбекистон терма жамоаси жаҳон чемпионатига чиқади ва у ерга борганда бизни уялтириб қўймайди.
Ҳаммага омад тилайман. Ўйлаб қўйган ниятингиз рўёбга чиқсин. Соғ бўлинглар”, - дея сўзларини якунлади Мираброр Усмонов
Мираброр Усмонов Ўзбекистон футболига қўшган улкан ҳиссаси учун тантанали равишда эсдалик совғалари билан тақдирланди.
