Олий лиганинг 21-туридан ўрин олган “Пахтакор” - “Шўртан” (3:0) учрашувидан сўнг, меҳмонлар бош мураббийи Геннадий Кочнев ўз фикрларини айтди.

"Аввало “Пахтакор” жамоаси ва мухлисларини ғалаба билан табриклайман. Биринчи бўлимда ҳимояда зич ўйнашни режалаштиргандик. Аммо бу амалга ошмади. Ҳимоядаги қўпол хатолар бизга қимматга тушди. Бугун таянч ҳудудида ҳаракат қилган футболчиларимиз кутилган ўйинни кўрсата олишмади. Уларнинг ёмон ўйини туфайли рақибнинг бир қатор ҳужумларини ўтказиб юбордик. Бу эса голларга олиб келди.

“Локомотив” билан ўйинда яхши ҳаракат килгандик. Аммо бугун ёмон ўйнадик. Бугунги учрашувга тайёрлаган режамиз ўхшамади. Ўйин биз истагандек кечмади. Шунингдек, ҳимоядаги йўқотишлар ҳам ўйинимизга таъсир қилди. Маълумки, Мельзиддинов огоҳлантиришлари сони тўрттага етганлиги боис, бугун жамоага ёрдам бера олмади" - деди Кочнев.