Англия премьер лигасининг 15-тур учрашувлари ўз поёнига етди.

Мазкур турни «Манчестер Сити» ҳамда «Вест Хэм» ўртасидаги супер-ўйин якунлаб берди. Ва унда «шаҳарликлар» 2:1 ҳисобида ғалабага эришди.

Баҳс одатдагидек «Манчестер Сити»нинг кетма-кет ҳужумлари билан бошланди. Тайм ўрталарига келиб эса меҳмонлар ўйинни бироз майдон марказига сура олишди.

Тайм охирларига келиб кутилмаганда мезбонлар дарвозаси ишғол этилди. Аниқроғи, 44-дақиқада қанотдан етказиб берилган тўпни Анжело Огбонна боши билан дарвозага жойлаб қўйди. Шу тариқа тайм якунланди.

Иккинчи бўлимда эса ҳақиқий ҳужумкор «Сити»ни кўринди ва «Вест Хэм» дарвозаси олдида ҳужумлар ёмғирини уюштирди.

Мазкур ҳолат эса, албатта, ўз мевасини берди ва 57-дақиқада Стерлингнинг тўп узатишидан сўнг Никлас Отаменди мувозанатни тиклади.

Мезбонлар бу билан тўхтаб қолишгани йўқ, аксинча голдан руҳланиб, янада катта куч билан олдинга ўтишди. Баъзи ҳолатларда омад мезбонлардан юз ўгирган бўлса, баъзи ҳолатларда Адрианнинг супер сейқлари «Вест Хэм»ни асраб қолганди.

Аммо бу ҳолат ҳам «болғачилар»га ёрдам бера олмади. 83-дақиқага келиб, Кевин де Брюненинг ажойиб узатмасидан сўнг Давид Сильва енгилгина ижро етган заргарона зарбаси билан ҳисобни жамоасининг фойдасига ўзгартирди ва манашу ҳисоб якунда «Манчестер Сити»га 3 очко билан бирга кетма-кет 13-ғалабани тақдим этди.

АНГЛИЯ ЧЕМПИОНАТИ. 15-ТУР

МАНЧЕСТЕР СИТИ – ВЕСТ ХЭМ 2:1 (0:1)

3 декабрь, «Этихад Стэдиум»

Голлар: 0:1 – 44 Огбонна, 1:1 – 57 Отаменди, 2:1 – 83 Сильва.

Манчестер Сити: Эдерсон, Уокер, Отаменди, Мангаля, Данило (Габриэл Жезус, 46), де Брюйне, Сильва, Сане (Бернарду Силва, 90), Делф, Стерлинг, Агуэро (Фернандиньо, 85).

Вест Хэм: Адриан, Сабалета, Масуаку, Крессуэлл, Огбонна, Антонио (Айю, 88), Обианг, Лансини (Арнаутович, 69), Райс, Фернандеш, Куяте (Сако, 43).

Огоҳлантиришлар: Райс (17), де Брюйне (59), Адриан (90), Габриэл Жезус (90+4).