"Реал" ярим ҳимоячиси Тони Кроос Испания Ла лигасининг 17-тури доирасида бўладиган "Барселона"га қарши ўйин олдидан ўз фикрларини билдириб ўтди. Германиялик футболчи жамоасининг клублар ўртасидаги жаҳон чемпионатидаги ғалаба навбатдаги "класико"га таъсир кўрсатмаслигига ишонмоқда.

"Мазкур ўйин арафасида қандайдир ғайритабиий ҳодиса ёки қўшимча мотивация шарт эмас. Албатта, яхши кайфиятда Мадридга қайтиш яхши, аммо "класико" — бу жуда муҳим ўйин. Аввал қандай натижа қайд этилгани муҳим эмас", – деди Кроос.

Шунингдек, 27 ёшли футболчи ўзининг формасини тиклаб бораётган Криштиану Роналду ҳақида ҳам фикр билдириб ўтди.

"У майдонда бўлганида бизга ёрдам беришга ҳаракат қилади. Буни биламиз. У гол уриш учун имконият қидиради. У клублар ўртасидаги жаҳон чемпионатининг ҳар иккала баҳсида гол уришга муваффақ бўлди. Роналду биз учун қанчалик муҳим футболчи эканини ортиқча эслатиш шарт эмас", – деди Тони Кроос.

"Реал" ва "Барселона" ўртасидаги ўйин 23 декабрь куни "Сантьяго Бернабеу"да бўлиб ўтади.