"Барселона" «Ливерпуль»дан Филиппе Коутиньони сотиб олганидан кейин жамоанинг трансферлар учун мўлжалланган ҳисоб-рақамида пул қолмади.
Marca тарқатган хабарга кўра, клуб ушбу мавсумда трансферлар учун жами 312 миллион евро сарфлади. "Кўк-анорранглилар" бу суммага Коутиньо, Усмон Дембеле, Паулиньо, Нелсон Семеду, Жерар Деулофеу ва Марлонни сотиб олишди. «Барселона» 226 миллион еврога футболчи сотишди (Неймар ва Кристиан Тельо). Шунингдек, клуб трансферлар учун аввалдан 60 миллион евро маблағга эга эди.
Жамоа трансфер бюджети ҳозирда 26 миллион евро дефицитга эга. «Палмейрас» ҳимоячиси Йерри Мина ҳам харид қилинадиган бўлса, ушбу сумма яна 12 миллион еврога ошиши мумкин.
Бундан ташқари, жамоанинг музей ва чипталар сотувидан тушадиган даромад камайган. «Барселона» янги ҳомийлар топишга ҳаракат қилмоқда, бироқ Каталониядаги сиёсий вазият туфайли бу иш қийинчилик туғдирмоқда. Қарзлар туфайли жамоа 2018 йилда "Камп Ноу"нинг реконструкциясини бошлай олмайди.