Ўзбекистон чемпиони – Тошкентнинг “Локомотив” клуби Дубайда янги мавсумга тайёргарлик кўрмоқда.
Сафарда улар Россия Премьер-лигаси иштирокчиси “Рубин” клуби билан ўртоқлик учрашувини ўтказиб дуррангга имзо чекишди (0:0).
Учрашувдан сўнг “Локомотив” жамоаси ҳимоячиси Ислом Тўхтахўжаевни суҳбатга чорладик.
- “Рубин” - “Локомотив” (0:0) ўйини ҳақида қисқача фикрингиз?
- Ушбу учрашувни биз учун фойдаси кўп бўлди. “Рубин” клубининг тарихи бор, улар кучли жамоа. Уларга қарши ўйнаш фойдали деб ҳисоблайман. Биз янги тактика устида ишлаяпмиз. Яна шуни айтиш жоизки, хатоларимиз устида ишлаяпмиз ва бу янги мавсумда ўз самарасини беради албатта.
-Жамоа таркибидаги ўзгаришлар қандай? Янги футболчиларни жамоага мослашиши тўғрисида нима дея оласиз?
- Албатта таркибимиздаги янги футболчилар жамоага мослашишмоқда, биз уларга бу борада кўмаклашаяпмиз. Улар яхши тааъссурот уйғотмоқда. Биз улар билан ғалабалар сари бора оламиз.
-Янги футболчилардан кимнинг ҳаракатларини ижобий баҳолай оласиз?
- Алоҳида кўрсата олмайман, чунки эндигина улар билан иккинчи учрашувни ўтказдик. Менга кўпроқ, Россиялик ҳужумчи Дмитрий Барковнинг ҳаракатлари ёқди.
-Клубнинг янги мавсум олдидан мақсадлари қандай?
- Ҳа, албатта! Ўтган мавсумда йўл қўйган хатоларимиз, яъни учрашувларнинг сўнгги дақиқаларидаги эътиборсизликларимиз бизга панд берган. Бугун шулар устида ишлаяпмиз. Асосан жисмоний ҳолатимизни тўғрилашга урғу берганмиз.
-“Локомотив” учун клубларимиз ичида энг ноқулай рақиб “Пахтакор”ми? Ёки бошқа?
- Тўғрисини айтсам мен учун “Металлург” ва “Машъал” жамоалари асосий рақиблар деб ҳисоблайман.
-Ислом Тўхтахўжаевнинг “Локомотив” клуби билан шартномаси қачон тугайди? Келажак режаси борми? Хориж клублардан таклифлар борми?
- “Локомотив” билан шартномам ҳали тугамайди. Хориж клубларидан таклифлар бор, аммо мени ва клубни қониқтира оладиган таклиф йўқ. Шунинг учун ҳам ҳозирча “Локо”даман, насиб қилса хориж клубларидан таклиф бўлса, албатта йўқ демасдим.
- Қайсихорижий клублардан қандай таклифлар бўлган?
- Таклифлар бўлган, аммо айрим сабабларга кўра шартномалар тузилмаган. Буни эслашни истамайман.
- Ҳозирги янгиланган раҳбариятдан шахсан кўнглингиз тўляпдими, ўзингиз учун қандай ўзгаришлар ва имкониятлар кутяпсиз?
-Янги раҳбариятдан ҳамма қаторида яхши нарсаларни кутяпман. Кўпроқ футболчиларга ёрдам беришларини, чунки кўпчилик футболчилар шартномалари тугаганидан сўнг белгиланган пулларини ололмай, сарсон бўлишади. Шу томонларга ҳам эътибор беришса яхши бўларди.
- Миллий терма жамоамизнинг собиқ бош мураббийси..... (Саволимиз якунланмади).
- Илтимос! Фақат Самвел Бабаян ҳақида сўраманг!
- Ўзбекистон миллий терма жамоасини хорижлик қайси мураббий бошқаришини истардингиз?
- Пеп Гвардиола (кулади).
- Агар миллий терма жамоамиз учун таркиб тузиш имкониятингиз булганда кимларни асосий таркибда кўришни истар эдингиз?
- Қайси футболчи бўлишидан қатъий назар яхши формада, кўрсаткичлари яхши бўлган футболчиларни асосий таркибга қўярдим.
Маъмур Пармонов суҳбатлашди.
