Бугун "Қўқон-1912" сардори Носир Отақўзиевнинг туғилган куни. Тажрибали ҳужумчи бугун ўзининг 34 ёшини қарши олмоқда. Шу муносабат билан “Қўқон-1912” футбол клуби раҳбарияти, мураббийлар штаби, футболчилар ва мухлислар номидан Носирбекни чин юракдан табриклаймиз. Унга сиҳат-саломатлик, оилавий бахт, футболчилик фаолиятида омадлар тилаб қоламиз.
Қуйида унинг фаолиятига доир қизиқарли мақолани ҳукмингизга ҳавола этамиз.
Фаолиятининг бошланиши
Носирбек Отақўзиев 1984 йил 30 январь куни Риштон туманида туғилган. Футболчилик фаолиятини Қувасойнинг “Цементчи” жамоасида бошлаган. Ушбу жамоадаги ёрқин ўйинлари орқали Юрий Саркисян назарига тушган ҳужумчи тез орада “Нефтчи” таркибига келиб қўшилади. Носирбек “Нефтчи”га келганида жамоанинг ҳужум чизиғидаги рақобат кучли эди. Шунга қарамай, ёш ҳужумчи ўзини йўқотиб қўймайди ва “Нефтчи”нинг етакчиларидан бирига айланади. Фарғонадаги тўрт йиллик фаолияти давомида Отақўзиев 116 та ўйинда майдонга тушиб, рақиблар дарвозасига 48 та тўп киритишга муваффақ бўлган.
Чемпионат тўпурари
2009 йилги мавсум арафасида “Нефтчи”ни тарк этган тажрибали ҳужумчи Наманганнинг “Навбаҳор” жамоаси сафига бориб қўшилди. У ерда 25 та ўйинда майдонга тушиб, ўз ҳисобидаги голлари сонини яна тўртага кўпайтириб олди.
2010 йил Носир Отақўзиев ҳаётида унутилмас бўлди. “Олмалиқ” жамоасида ўйнаган ҳужумчи мавсум давомида 13 та тўп киритиб, Алишер Холиқов билан бирга Ўзбекистон чемпионати тўпурари бўлди.
Катта муваффақиятлар
2011 йилги мавсумни Носирбек мамлакатимизнинг яна бир номдор жамоаси “Насаф” таркибида ўтказди. У ерда Отақўзиев фаолиятдаги энг ёрқин дамларни ўтказди. 2011 йилда “Аждарлар” ОФК кубогини қўлга киритишди. Ғолиб жамоа сафида Носир Отақўзиев ҳам бор эди.
“Нефтчи”га қайтиш
Айни дамда “Қўқон-1912” жамоаси шарафини ҳимоя қилаётган Носир Отақўзиев 2012 йилнинг иккинчи яримини “Олмалиқ”да ўтказди. 2013 йилнинг биринчи даврасида “Гулистон” клубида тўп сурди. 2013 йилнинг иккинчи ярмидан эса Отақўзиев яна “Нефтчи”га қайтди.
2015 йилдан эса “Қўқон-1912” жамоаси аъзосига айланди. Шу кунга қадар Носир Отақўзиев чемпионат баҳслари давомида 105 та тўп киритиб, айни дамда фаолиятини давом эттираётган футболчилар орасида энг сермаҳсул ўйинчи бўлиб турибди. Отақўзиев ҳар бир мавсумда рақиблар дарвозасига йўл топа олган.
Носир Отақўзиев қўқонлик мухлисларнинг ёқимтойига айланганини ҳам эътироф этмасдан иложимиз йўқ. Айнан унинг голлар жамоамизга муҳим ғалабаларини келтирган.
Айтганча, Носирбек Отақўзиев уч марта Ўзбекистон миллий терма жамоаси либосида майдонга тушганини ҳам таъкидлаш жоиз.
Унинг кейинги фаолиятида ҳам омадлар тилаб қоламиз.
Яна бир бор туғилган кун муборак, Носирбек!
