Мадриднинг "Реал" клуби ҳозирда юқори формага кириб олганини исботлашда давом этмоқда. "Қироллик клуби" Ла лиганинг 25-тури доирасида ўз майдонида "Алавес"ни қабул қилиб, йирик ҳисобда ғалаба қозонди.

Биринчи бўлимда жамоалар нисбатан очиқ ўйин намойиш қилишди. "Қаймоқранглилар"нинг имкониятларга эга бўлгани табиий ҳолат, аммо, кутилмаганда, меҳмонлар ҳам танаффусга қадар кўпгина вазиятларни юзага келтиришди. Бироқ улардан фойдаланишда "Алавес" футболчиларига маҳорат етишмади.

Тайм тугашига арафасида Бензема рақиб жарима майдончаси ичида тўпни эгаллади ва товони билан ўз ортида турган Роналдуга етказди. Криштиану чап оёқда аниқ зарба билан дарвоза бурчагини ишғол қилди.

Иккинчи бўлимнинг старти мадридликлар учун омадли келди. Бензема майдон марказида тўпни меҳмон футболчисидан олиб қўйди ва қарши ҳужумга асос солди. Унинг узатмасидан кейин Бэйл жарима майдончасига кириб бориб, яқин бурчакка тўпни жойлади.

Баҳснинг 61-дақиқасида Васкеснинг узатмасидан кейин Роналду жамоасининг учинчи голини уришга муваффақ бўлди. Ўйин сўнгида эса мезбонлар пенальти ишлашди. Кутилмаганда, Криштиану 11 метрли жарима зарбаси тепиш ҳуқуқини Бенземага берди. Учрашув давомида кўп вазиятлардан фойдалана олмаган Карим, бу сафар рақиб дарвозасини забт этишга муваффақ бўлди.

Ушбу ғалабадан кейин "Реал" ўз очколарини 51тага етказиб олди.

Испания Ла лигаси, 25-тур
Реал Мадрид – Алавес 4:0 (1:0, 3:0)
Голлар: 1:0 – 44 Роналду, 2:0 – 46 Бэйл, 3:0 – 61 Роналду, 4:0 – 89, пенальти Бензема.
Реал Мадрид – Навас, Начо, Тео, Карвахаль, Варан, Васкес, Каземиро (Льоренте, 80), Ковачич (Себальос, 73), Бэйл, Бензема, Роналду.
Алавес – Пачеко, Лагуардиа, Дуарте, Руано, Эли, Торрес, Ману Гарсия (Медран, 63), Педраса (Ибаи Гомес, 62), Перес, Гвидетти (Бурги, 74), Собрино.
Огоҳлантиришлар: Перес (5), Собрино (20), Льоренте (82).