«Ливерпуль» бош мураббийи Юрген Клопп ярим ҳимоячи Филиппе Коутиньонинг «Барселона»га кетгани жамоасига ижобий таъсир қилганидан мамнун.
«Агар етакчи ўйинчи майдонга тушмаса, ўйининг баъзан жуда зўр чиқади. Тўғри, кўп ҳолларда бундай футболчига алоҳида эҳтиёж сезасан.
Коутиньо жамоамизда чин етакчи эди. Дейлик, ҳаракатлар ўхшамай қолса, йигитлар тўпни айнан унга узатиб, қандайдир янги ғоя кутишарди. Фил кетгач, ишни бошқача йўлга қўйиш, масъулиятни футболчилар ўртасида тенг тақсимлаш кераклигини англадик.
Мана, бир неча ҳафтадан буён Коутиньосиз ўйнамоқдамиз ва футболчиларнинг ҳаракатларидан бағоят хурсандман.
Зеро, улар олдинга бир қадам ташладилар - бу Филиппе трансферининг ижобий таъсири», - деди Клопп.
