Суперлиганинг 2-туридан ўрин олган “Бунёдкор” – “Пахтакор” (1:0) ўйинидан сўнг, меҳмонлар устози Шота Арвеладзе ва ярим ҳимоячи Жалолиддин Машарипов ўз фикрларини билдиришди.

“Пахтакор” ўйин охирида мағлубиятдан қутулиб қолиши мумкин эди. Бироқ, Жасур Ҳакимов пенальтини аниқ амалга ошира олмади. Унинг зарбасидан сўнг, дарвозабон Мурод Зухуров тўпни ушлаб қолишга эришди.

Арвеладзе: Биз 90 дақиқа рақибдан кучлилик қилдик, ўйинни тўлиқ назоратимизга олдик. Кўплаб имкониятлардан фойдаланмадик. Баъзида футболда шундай бўлиб туради. Энг яхши жамоа ютавермайди.

Футболда баъзан кимдир тўпга кўпроқ тегади, бошқаси эса йўқ. Уларни шу жиҳатлар ажратиб туради. Ўйин тарафлама яхши кўриндик, аммо якунлашда хатолар қилдик. Мавсум энди бошланди, ўйинимизни кучайтириб борамиз

Футболда ўзи энг қийини гол уриш. Кўпроқ тўп киритган ютади. Вазиятларни якунлаш борасида ишлаяпмиз, машғулотларда барча меҳнат қилмоқда.

Пенальтини нега Ҳакимов тепди? Ўша ҳолатда ким ўзини тайёр сезса, у тўпга яқинлашади.

Машарипов: - Биз жуда яхши ҳаракат қилдик. Ўйинни бошқардик, вазиятлар яратдик. Бироқ вазиятларни якунлашда хатога йўл қўйдик. Мағлубиятдан кўра яхшироқ натижага арзирдик”, - дея сўзларини якунлади Машарипов.