Ўзбекистон терма жамоаси ва «Локомотив» ҳимоячиси Ислом Тўхтахўжаев Сенегал ва Марокаш терма жамоаларига қарши ўртоқлик учрашувлари олдидан ўз фикрлари билан ўртоқлашди.
«Кучли терма жамоаларга қарши қанчалик кўп ўйнасак, шунчалик тажрибамиз ортади. Кучли футболчиларга қарши ўйинлар ривожланишимиз учун ёрдам беради ва ўзбек футболи учун фақат ва фақат фойда беради.
Ҳозирча асосан Сенегал терма жамоасига қарши ўйинга тайёргарлик кўрмоқдамиз. Сабаби Марокаш билан ўйингача ҳали вақтимиз бўлади. Тайёргарликни Тошкентдаёқ бошлагандик. Кейин Истанбулда легионерларимиз ҳам қўшилиб тўлиқ таркибда шуғулландик.
Тайёргарлик асосан назарий машғулотларни ўз ичига олмоқда. Сенегал қандай футбол кўрсатади, қандай ҳужум қилади ва қандай ҳимояланади. Шуларни тўлиқ ўрганиб чиқдик», дея гапириб ўтди Тўхтахўжаев UzReport телеканалига берган интервьюсида.
