“Барселона” ва “Ювентус” ЕЧЛ доирасида уй ўйинларида исталган рақибга муносиб қаршилик кўрсатишларини исботлаб келишмоқда.

Бу иккала жамоа 2013 йил баҳоридан бери ЕЧЛда ўз уйларида ҳали мағлуб бўлишмабди. Каталонияликларнинг бу борадаги мағлубиятсиз серияси 25 та ўйинга, туринликларники эса 23 та ўйинга етди. “Ювентус”нинг сериясига “Реал” барҳам бериши мумкин, мадридликлар 3 апрель куни Италияга сафар уюштиришади. Шунингдек, “Барселона” ўз уйида “Рома”ни қабул қилади.

“Барселона” ва “Ювентус”ни ўз уйида охирги марта ким мағлуб этган. Жавоб битта — “Бавария”. Мюнхенликлар 2012/2013 йилларда бундай натижага эришишган. Қизиғи, ЕЧЛда уй ўйинларида мағлуб бўлмаслик борасидаги рекорд ҳам айнан “Бавария”га тегишли экан. Немис клуби 1998 йилдан 2002 йилгача 29 та уй учрашувини ўтказган ва мағлуб бўлмаган, бу анъана жамоа рақибларини “Олимпиаштадион”да қабул қилмагунча давом этган. Бу даврда “Бавария” 1999 ва 2001 йилларда финалгача етиб борган.

“Барселона” 25 та мағлубиятсиз серияда 23 та ғалаба ва 2 та дуранг қайд этган. У рақиблар дарвозаларига 77 та гол уриб, 12 та гол ўтказиб юборган.

Турин клуби эса 23 та мағлубиятсиз серияда 14 та ғалаба ва 9 та дурангга эришган. Бу ўйинларда “Ювентус” рақиблар дарвозаларини 37 марта ишғол этган ва ўз дарвозасидан 16 та гол олиб чиққан.

29 “Бавария”(04.03.1998-02.04.2002)

25 “Барселона”(18.09.2013-...)

24 “Арсенал”(14.09.2004-15.04.2009)

23 “Ювентус”(02.10.2013-...)

23 “Манчестер Юнайтед”(27.09.2005-03.11.2009)

21 “Челси”(12.09.2006-08.12.2009)

21 “Барселона”(24.11.2009-10.04.2013)

21 “Реал”(27.09.2011-09.12.2014)