Эртага "Локомотив" Суперлига доирасидаги навбатдаги учрашувини ўтказади. Бу сафар "темирйўлчилар" жамоасига пойтахтимизнинг яна бир жамоаси – "Пахтакор" рақиблик қилади.  

"Локомотив"нинг етакчиларидан бири Сардор Мирзаев мазкур ўйин олдидан клуб расмий сайтига ўз фикрлари билан ўртоқлашди:

- Куни кеча Тошкентнинг гранд жамоаларидан бири "Бунёдкор" устидан ғалаба қозондик. Ана энди бизни олдинда "Пахтакор"га қарши яна бир жиддий тўқнашув кутиб турибди. Ушбу матч олдидан асосан тикланиш машғулотлари ўтказдик. Сабаби иккала ўйин ўртасида унча катта вақт йўқ эди. Умуман олганда, навбатдаги дербига тайёрмиз, дея оламан. Бундай даражадаги учрашувларда майдонга тушиш ҳамиша ёқимли. Мухлислар ҳам икки гранд қарама-қаршилиги пайти асло зерикиб қолишмайди. Тўғри, мавсумни у қадар муваффақиятли бошлай олмадик. Лекин охирги турлардаги ғалабалар ўзимизга бўлган ишончни қайтарди. Ҳали олдинда бизни улкан ғалабалар кутаётганига ишончим комил, - деди тажрибали футболчи клуб расмий сайтига.

Таъкидлаб ўтамиз, "Локомотив" – "Пахтакор" баҳси эртага, 29 апрель куни пойтахтимиздаги "Бунёдкор" ўйингоҳида бўлиб ўтади. Учрашув соат 20:00да бошланиши кўзда тутилган.