Ўзбекистон футбол ассоциацияси томонидан Ўзбекистоннинг турли ёшдаги терма жамоалари учун йиғинлар ўтказиш ва бўлажак мусобақаларга муносиб тайёргарлик кўришлари учун барча шарт-шароитлар яратиб берилмоқда.
Жумладан, Ўзбекистон ўсмирлар терма жамоасига номзод футболчилар ўртасида 28 апрельдан 2 май кунига қадар “Чиғатой” спорт базасида ўқув-машғулот йиғинлари ўтказилди. Ушбу йиғин давомида мураббийлар штаби 2004 йилда туғилган ёш футболчиларнинг майдондаги фикрлаш қобилиятини, техник-тактик имкониятларини кўздан кечиришди, юзага келган камчиликлар таҳлил қилиниб, тегишли кўрсатмалар берилди.
Йиғин доирасида иккита назорат учрашуви ташкил қилинди. Бунёдкор стадионида бўлиб ўтган ушбу ўйинларда Азамат Абдураимов шогирдлари 2003 йилда туғилган “Спартак” жамоаси футболчиларини 3:1 ҳисобида, ҳамда шу йилда туғилган “Бунёдкор” жамоаси аъзоларини 3:2 ҳисобида мағлубиятга учратдилар.
Бундай ўқув-машғулот йиғинларини йил давомида мунтазам ўтказиб бориш режалаштирилган.
