Ўзбекистон Миллий олимпия қўмитаси Президенти ва мамлакат футбол ассоциацияси биринчи вице-президенти Умид Аҳмаджонов футбол бўйича Осиё чемпионатининг қуръа ташлаш маросимида иштирок этиш учун Дубай шаҳрига жўнаб кетгани хақида хабар бергандик.

Сафар давомида МОҚ раҳбари бир қатор Халқаро спорт ташкилот раҳбарлари билан кўришиб, музокаралар ўтказиши ҳам режалаштирилганди. Ана шундай учрашувлардан дастлабкиси бугун Осиё велоспорт конфедерацияси президенти Осама Аҳмад Абдулла ал-Шафар билан бўлиб ўтди.

Дубайда ташкил этилган учрашувда томонлар Ўзбекистонда велоспортнинг ривожланиш тенденциялари, спортнинг ушбу турини янада оммалаштириш, Ўзбекистон Миллий олимпия қўмитаси, мамлакат велосипед спорти федерацияси ҳамда Осиё велоспорт Конфедерацияси ўртасида стратегик алоқаларни янада кенгайтириш, ҳамкорликда амалга оширилаётган бир қатор лойиҳалар ҳусусида фикр алмашишди.

Шунингдек, Тошкент мезбонлик қиладиган 2019 йилги Осиё чемпионатининг ташкилий масалаларини муҳокама қилишди. Умид Аҳмаджонов яқин ҳамкорлик учун жаноб ал-Шафарга миннатдорчилик билдирди ва Ўзбекистон Миллий олимпия қўмитаси номидан эсдалик совғаларини тақдим этди.

Мазкур учрашув Ўзбекистонда велоспорт ривожи, унинг тараққиёти йўлида ташланган навбатдаги муҳим қадам бўлди десак адашмаган бўламиз.