Бугун пойтахтимизда спорт курашлари бўйича ўсмирлар ўртасида Осиё чемпионати старт олди. «Ўзбекистон» спорт мажмуаси мезбонлик қиладиган қитъа чемпионати октябрь ойида Буэнос-Айрес шаҳрида ўтказиладиган III ёзги ўсмирлар Олимпия ўйинларига йўлланмалар ҳам тақдим этади.
Ушбу мусобақада Осиёнинг Хитой, Ҳиндистон, Эрон, Ироқ, Иордания, Япония, Қозоғистон, Қирғизистон, Жанубий Корея, Саудия Арабистони, Мўғулистон, Покистон, Сингапур, Сурия, Таиланд, Тожикистон, Туркманистон, Тайвань, Яман ва Ўзбекистон каби 21 та давлатидан 400 нафарга яқин спортчи ва мураббийлар иштирок этадилар.
Маълумот учун, ҳар уччала йўналиш (эркин, юнон-рум ва аёллар кураши) бўйича бешта вазн тоифасида (ўсмирлар Олимпия ўйинлари дастурига киритилган вазнлар) чемпионликни қўлга киритган спортчилар лицензия соҳибига айланадилар. Демак, қитъа чемпионатида ўсмирлар Олимпия ўйинларига жами 15 та лицензия ўз эгасини топади.
Мусобақада умумий ҳисобда 30 та медаллар жамланмаси ўйналади. Қайд этиш лозимки, ушбу мусобақада ғолибликни қўлга киритган спортчилар олтин медаллардан ташқари, Осиё чемпионатлари тарихида илк маротаба ташкилотчилар томонидан тайёрланган махсус чемпионлик камарига ҳам эга бўладилар.
Айни пайтда юнон-рум кураши бўйича –45, -48, -51, -55, -60, -92, -110кг вазн тоифаларида финалчилар аниқланмоқда.
Ҳозирча ҳамюртларимиздан Л.Ўзбеков (-51кг) қозоғистонлик рақибини мағлубиятга учратиб, кейинги даврага йўл олди. К.Юнусхонов (-45кг) ва Муҳаммадали Сайдуллаев -(110кг)лар эса афсуски илк босқичдаёқ имкониятни бой бериб қўйишди.
Соат 17:30да мусобақанинг тантанали очилиш маросими бўлиб ўтади. 18:00дан бошлаб эса финал беллашувлари старт олади. Демак, Буэнос-Айресга дастлабки йўлланмалар эгалари номи аниқ бўлади. Миллий олимпия қўмитаси ушбу мусобақада ёш полвонларимизга омад тилаб қолади.
