Чирчиқ шаҳридаги Жалолиддин Мангуберди спорт мажмуасида ёзги биатлон бўйича Ўзбекистон чемпионати якунланди.
С.Ничипуренко хотирасига бағишланган мусобақанинг эркаклар ўртасидаги спринт дастури 4000 метр масофада ўтказилиб, уни Сурхондарё вилояти вакили, спорт устаси Виталий Сластён 15 дақиқа 59 сонияда босиб ўтди. Ундан 14 сония ортда қолган фарғоналик Музаффар Мамасолиев иккинчи ўринни қўлга киритди. Бухоролик спортчи Уйғун Замонов эса финишга пешқадамдан 26 сония кечроқ етиб келган.
Чемпионатнинг иккинчи куни таъқиб пойгалари ҳам муросасиз кўриниш олди. Дастлабки ўрин соҳиблари таъқибчиларини етиб олишларига имкон яратишмади. Виталий Сластён яна биринчи, Музаффар Мамасолиев эса иккинчи бўлиб маррага етиб келишди. Учинчи ўринга эса наманганлик Дониёр Қурбоналиев сазовор бўлди. Қисқа танаффусдан сунг яна мамлакат чемпионатида қатнаша бошлаган иқтидорли спортчи Мурод Ҳожибоев тўртинчи ўринга кўтарилди.
“Мусобақаларда 15 ёшли спортчиларни ҳам стартга чиқиб, катталар ўртасидаги чемпионатда етакчилик учун курашганини Ўзбекистон биринчиликларининг самараси сифатида қараш мумкин. Бундан ташқари, ёш спортчиларнинг терма жамоамиз таркибида жаҳон кубоги ва чемпионатларида тажриба орттирган спортчиларимизга қарши тенгма-тенг кураш олиб бораётгани республикамизда иқтидорли ёшларнинг кўплиги, уларни саралаш ва халқаро мусобақаларга тайёрлаш учун ҳали кўп меҳнат қилишимиз кераклигини кўрсатмоқда”, – дейди чемпионат бош ҳаками, республика техник ва амалий турлари маркази бош директори ўринбосари Ш.Исматуллаев.
Чемпионатнинг аёллар ўртасидаги спринт баҳслари 3000 метр масофада ташкил этилди. Унда самарқандлик спортчилар етакчилик қилишди. Мадина Сагатова (15 д. 57 с), Севара Чориева (18д. 07 с) ҳамда Эъзоза Хошимова (18д.52с) кучли учликдан жой олишди. Айнан шу спортчилар таъқиб пойгаларида рақибларини қувиб етишларига имкон беришмади. Ҳар иккала йўналишда Тошкент, Наманган, Фарғона вилояти спортчилари етакчиларнинг асосий таъқибчилари бўлишди.
Умумжамоа ҳисобида Самарқанд вилояти спортчилари биринчи ўринни қўлга киритдилар. Иккинчи ва учинчи ўринлар мос равишда Сурхондарё ва Фарғона вилояти биатлончиларига насиб қилди.
