Киевдаги “Олимпийский” стадионида бугун катта ўйинлардан бири – Европа чемпионлар лигасининг финал учрашуви бўлиб ўтади.
 
Финалда Европанинг энг кучли икки клуби “Ливерпуль” ва “Реал” ўзаро баҳс олиб боради. Ўйиннинг жуда ҳам қизиқ ва рақобатга бой бўлиши аввалдан тахмин қилинмоқда.
 
Чунки “Ливерпуль” таркибида Муҳаммад Салоҳ, “Реал”да эса Криштиану Роналду каби гол уришни яхши кўрадиган футболчилар бугун яна ўзаро бир-бирига қарши майдонга тушади.
 
Мадридликлар финалга йўлланмани ярим финалда “Бавария”га қарши бўлиб ўтган иккита учрашувдан иборат асабий тўқнашувда (4:3) ғолиб бўлиб қўлга киритган бўлса, “Ливерпуль” унга нисбатан осонроқ ўйинда “Рома”ни ярим финалда чиқариб юборган.
 
Финал бўладиган “Олимпийский” стадиони 2012 йил Европа Чемпионати учун қайта таъмирланган булиб, ўшанда испанлар финал ўйинида Италия терма жамоасини 4:0 ҳисобида  доғда қолдирган эди. Майдон ўриндиқлари 63000 мухлис учун мўжалланган.
 
Сербиялик, 45 ёшли Милорад Мажич финал учрашувининг бош ҳаками ҳисобланади. Унга қанотларда Милован Ристич ва Далибор Журжевичлар (барчаси Сербиядан) ёрдам беради. Тўртинчи ҳаками сифатида франциялик Клемен Тюрпен тайинланган.
 
Украина футболининг яқин ўтмишдаги юлдузи Анрей Шевченко УЕФА томонидан мусобақа элчиси деб тайинланган.
 
Ўтган ой бўлиб ўтган ярим финал иширокчилар ўртасидаги қуръа ташлаш жараёни натижасига кўра, “Реал” Мадрид финал мезбони ҳисобланади. Демак, тайёрланинг бугун бизни соат 23:45 да ажойиб финал кутмоқда!