Про-Лига 13-туридан жой олган “Ёзёвон-Лочинлари” — “Нурафшон” ўйини белгиланган вақтдан кечиктирилиши мумкин.
Учрашув аввал 17:00 га тайин қилинганди (ПФЛ Про-Лига клубларига вақтни ўзаро келишиб белгилаш учун рухсат берган). Кейинроқ мезбонлар ҳаво ҳароратидан келиб чиқиб, учрашув комиссаридан ўйин вақтини ярим соатга кечиктиришни сўради. Меҳмон томон ҳам буни қўллаб-қувватлагач, ўйин ярим соат кечикди.
Энди эса учрашув ПФЛ комиссарининг билдиргиси сабаб янада кечикиши катта эҳтимол. Чунки стадионнинг айни вақтдаги ҳолати талабга жавоб бермайди. Футболчилар тўп сурадиган жойларда ёриқлар пайдо бўлгани етмаганидек, ўйин бўлиши кутилаётган майдонда тахталарни ҳам топиш мумкин.
Қолаверса, стадион майсаси ўсиб кетган ва етарли даражада калталанмаган. Бунда эса тўп етарли масофагача думалаб бориши ҳам даргумон.
“Ёзёвон-Лочинлари” клуби раҳбарияти 18:15 гача берилган топшириқни бажармаса, комиссар учрашувни бошламайди. Бу ҳолат ПФЛ комиссияси томонидан алоҳида ўрганиб чиқилади.
P.S. Про-Лига клублари бежизга икки зонага ажратиб қўйилмаган. Июнь ойига қадар клублар ўзини ўнглаб олиши учун вақт берилди. Бироқ жамоалар бундан тўғри хулоса чиқармади. Эндиликда ишламаётган клубларга шавқат қилинмайди. Зеро бундай масъулиятсизлик билан футболни ривожлантириб бўлмайди.
