Пойтахтимизда Олий таълим муассасалари талабалари ўртасида мини-футбол бўйича «Олимпия юлдузлари» мусобақаси якунига етди.
Миллий олимпия қўмитаси ташаббуси билан ташкил қилинган турнирнинг финал босқичида 15та жамоа ғолиблик учун кураш олиб борди.
Бугун Тошкентнинг Миробод туманида жойлашган иккинчи БЎСМда мусобақанинг ҳал қилувчи ўйинлари бўлиб ўтди. Финал босқичида Қарши муҳандислик-иқтисодиёт институти жамоаси Қорақалпоғистон давлат университети талабаларидан ташкил топган жамоага қарши баҳс олиб борди. Қизғин ва кескин курашларга бой кечган ўйиннинг асосий вақти 1:1 ҳисобидаги дуранг билан якунланди. Пенальтилар сериясида эса қаршилик футболчиларнинг қўли баланд келди. Шу тариқа, Қарши муҳандислик-иқтисодиёт институти жамоаси «Олимпия юлдузлари» мусобақаси ғолибига айланди. Учинчи ўрин эса Тошкент шаҳар архитектура ва қурилиш институти жамоаси вакилларига насиб қилди.
Финал учрашуви якунига етгач, ғолиб ва совриндорлар Миллий олимпия қўмитаси томонидан тақдирланишди.