Poytaxtimizda Oliy ta’lim muassasalari talabalari o‘rtasida mini-futbol bo‘yicha «Olimpiya yulduzlari» musobaqasi yakuniga yetdi.
Milliy olimpiya qo‘mitasi tashabbusi bilan tashkil qilingan turnirning final bosqichida 15ta jamoa g‘oliblik uchun kurash olib bordi.
Bugun Toshkentning Mirobod tumanida joylashgan ikkinchi BO‘SMda musobaqaning hal qiluvchi o‘yinlari bo‘lib o‘tdi. Final bosqichida Qarshi muhandislik-iqtisodiyot instituti jamoasi Qoraqalpog‘iston davlat universiteti talabalaridan tashkil topgan jamoaga qarshi bahs olib bordi. Qizg‘in va keskin kurashlarga boy kechgan o‘yinning asosiy vaqti 1:1 hisobidagi durang bilan yakunlandi. Penaltilar seriyasida esa qarshilik futbolchilarning qo‘li baland keldi. Shu tariqa, Qarshi muhandislik-iqtisodiyot instituti jamoasi «Olimpiya yulduzlari» musobaqasi g‘olibiga aylandi. Uchinchi o‘rin esa Toshkent shahar arxitektura va qurilish instituti jamoasi vakillariga nasib qildi.
Final uchrashuvi yakuniga yetgach, g‘olib va sovrindorlar Milliy olimpiya qo‘mitasi tomonidan taqdirlanishdi.
