Про-лига 16-турида «Хоразм» клуби Урганчда «Андижон»ни қабул қилди.

«Ёшлик» спорт мажмуасини тўлдирган мухлислар муросасиз ва қизиқарли курашларга бой баҳсни гувоҳи бўлишди деб хабар беради «Хоразм» клуби мухлислари телеграм канали.

Биринчи бўлим тенг курашлар остида ўтди. 18-дақиқада майдон эгалари дарвозаси томон пенальти белгиланди. Нодир Мавлонов уни аниқ амалга ошириб, ҳисобни очди.

Орадан 4 дақиқа ўтгач, ҳисоб тенглашди. Муҳаммадқодир Раҳимберганов ўнг қанотдан жарима майдонига етказилган тўпни чиройли зарба билан дарвозанинг пастки бурчагига жойлади.

Иккинчи бўлим меҳмонларнинг ҳужумлари билан бошланди. 51-дақиқада Шахбоз Жумабоев бир неча ҳимоячини ортда қолдириб, жарима майдонига кириб келди ва аниқ зарба йўллаб, тўпни дарвозага киритди.

Аммо, мезбонлар яна кучли ирода намойиш қилиб, ҳисобни тенглаштира олдилар. 70-дақиқада чап қанотдан жарима майдонига оширилган тўпни Сардор Матмуратов дарвозага йўллашга муваффақ бўлди. Ҳужумчи бу вазиятда ҳимоячилардан илдамроқ ҳаракат қилган эди.

78-дақиқада «Андижон» ғалаба келтирувчи голни урди. «Хоразм» ҳимоячиси Ойбек Нурбоев дарвозага кириб кетаётган тўпни қўли билан чиқариб юборди, натижада, қизил картага лойиқ кўрилди. Шахбоз Жумабоев пенальтини аниқ амалга ошириб, ҳисобни 2:3 кўринишига келтирди.

Ўйин якунига қадар «Хоразм» кўплаб ҳужумларни уюштирган бўлса-да, «Андижон» ҳимоячилари бехато ҳаракат қилиб, ўз дарвозалари даҳлсизлигини сақлаб қолишди. Натижада, бу мезбонларнинг жорий мавсумда, ўз майдонидаги илк мағлубияти бўлди.

Ўйиндан сўнг, мағлубиятга учраган бўлсалар-да, мухлислар «Хоразм» жамоаси футболчиларини олқишлар билан кузатиб қолишди.

Бу натижадан сўнг, «Андижон» 28 очко билан 3-ўринни, «Хоразм» 16 очко билан 5-ўринни эгаллаб турибди.

ПРО Лига, 16-тур
21 июнь, Урганч, «Ёшлик» спорт мажмуаси, 944 томошабин
ХОРАЗМ (Урганч) - АНДИЖОН (Андижон) - 2:3
Голлар: Муҳаммадқодир Раҳимберганов (22), Сардор Матмуратов (70) - Нодир Мавлонов (18 пен), Шахбоз Жумабоев (51, 78 пен)
Четлатиш: Ойбек Нурбоев (77, «Хоразм»)