Ўзбекистон футбол ассоциацияси ФИФА, УЕФА ҳамда ОФКнинг футболни ривожлантириш дастурларидан унумли фойдаланган ҳолда, юртимизда футболнинг ривожини янги босқичга олиб чиқиш, футбол инфратузилмасини яхшилаш борасида бир қатор чора-тадбирларни амалга оширмоқда.
Жумладан, ЎФА 1-вице Умид Аҳмаджонов ФИФА, УЕФА ва ОФК президентлари билан ўзаро учрашувлар чоғида Ўзбекистонда футболни ривожлантириш бўйича амалга оширилаётган ислоҳотлар билан уларни яқиндан таништириб, ана шу ислоҳотларни қўллаб-қувватлашни улардан сўраганди. Бу сўровга асосан юқорида номлари келтирилган ташкилотлар раҳбарлари Ўзбекистондаги футбол бўйича ислоҳотларни қўллаб-қувватлашга ҳамиша тайёр эканликларини маълум қилишган.
Ўзбекистон футбол ассоциацияси УЕФАнинг махсус UEFA Assist дастури асосида грандларни қўлга киритиш бўйича ўз таклиф ва ғояларини Европа футбол ассоциациялари уюшмасига тақдим этди. Ўз ўрнида УЕФАга ЎФА томонидан келтирилган ғоялар маъқул келган ҳолда, дастур асосида Ўзбекистонга гранд ажратишга қарор қилди.
UEFA Assist дастури асосида “Чиғатой” ва ЎФА майдонларидаги ёритиш тизими капитал таъмирдан чиқариладиган бўлди. Ҳозирда бу борадаги ишлар фаол тарзда олиб борилмоқда. ЎФАнинг сунъий қопламали майдонларига замонавий ёритиш ускуналари ўрнатилмоқда. Ушбу ёритиш ускуналари 600 люкс миқдорида ёруғлик тарқатиб, кечки вақтда ҳам бемалол футбол учрашувларини ўтказиш учун имкон беради.
Тез орада “Чиғатой”да ҳам UEFA Assist дастури асосида ёритиш тизими тўлалигича капитал таъмирдан чиқарилади.