Хорватия пойтахи Загреб шаҳрида спорт курашлари бўйича ўсмирлар ўртасида жаҳон чемпионати давом этмоқда. Эркин кураш бўйича беллашувларда -55кг вазн тоифасида юртимиз шарафини ҳимоя қилаётган Жамшид Маруфов Исроил (10:0), Арманистон (соф ғалаба), Россия (10:0) ва Италия (5:4) мамлакатларидан ташриф буюрган рақибларини мағлуб этиб финалга йўл олганлиги ҳақида хабар бериб ўтгандик. Ҳамюртимиз ҳал қилувчи жангда япониялик Хайято Фужитага қарши кураш олиб борди ва рақибидан 4:3 ҳисобида устун келди. Ушбу ғалаба ёш полвонимизга жаҳон чемпионатининг олтин медалини тақдим этди.
Миллий олимпия қўмитаси ушбу муваффақият билан Ўзбекистон спорт курашлари ассоциацияси, спортчимиз ва мураббийларимизни табриклайди.
