Криштиану Роналдунинг «Ювентус» футбол клубига ўтишига қарши Италиянинг Мельфи коммунасида FIAT заводи ишчилари иш ташлаш ўтказиши режалаштирилаётгани ҳақида ёзган эдик (FIAT’нинг ҳам, "Ювентус"нинг ҳам эгаси бир); ишчилар: “Биз зўрға кун кўраётганимизда нега бир футболчи учун 100 миллион евро сарфланиши керак?!”, деб жиғибийрон бўлганди. Хабар беришларича норозилик намойишида 5 (беш) киши қатнашибди. Адашмадингиз — беш минг эмас, атиги беш киши қатнашибди.
Автозавод расмийлари хурсанд: FIAT’нинг Мельфидаги фабрикасида 1700 киши ишласа, иш ташлаш белгиланган кунларда бор-йўғи беш кишигина ишга чиқмаган.
“Иш ташлаш акцияси тўлиқ муваффақиятсизликка учради”, дейди корхона раҳбарларидан бири. Умуман олганда, “Ювентус” Роналду фамилияси ёзилган футболкалар савдосидан бир кунда 55 миллион евро ишлаб топгани маълум бўлгач, акция муваффақиятсизликка учраши аниқ эди.
