Мазкур мулоҳазаларни қоғозга туширишдан аввал, битта расмий маълумот эътиборимизни тортди. Гап шундаки, Халқаро чемпионлар кубоги доирасидан ўрин олган ва Жозе Моуриньога ёқмаган «МЮ» - «Ливерпуль» учрашувини стадионда 101254 нафар америкалик мухлис кузатибди.
«Беназир»ни таажжублантирган шунча мухлис еврофутболни жонли равишда кўриш учун пулини аямаган. Чунки улар Муҳаммад Салоҳ ёки ўзлари ёқтирган бошқа бир футболчининг ҳар доим ҳам АҚШ майдонида тўп сурмаслигини жуда яхши билишади.
Албатта, юлдуз ижрочилар ўйинини кўравериб, кўзи тўйган Жозе Моуриньони норасмий мақомдаги баҳс қизиқтирмаслиги табиий. Мегаюлдузлар ташрифига интизор мухлислар кўнглидаги ҳаяжонларни «юлдузлар фабрикаси»га бош бўлган «Беназир» қаердан билсин?
Қолаверса, ўша баҳсда «МЮ» йирик ҳисобда енгилди. Мағлубият ҳар қандай ҳолатда аламли. Рақиб ғалабасини эътироф этган мағлуб кўнглида алам олови ловуллаб туради, барибир. Биз «Навбаҳор» - «Пахтакор» учрашувидан сўнг икки жамоа мухлиси ўртасидаги суҳбатга қулоқ тутдик.
«Навбаҳор» мухлисининг «Ўйин ҳаққоний бўлди-а?» - қабилидаги саволига пойтахтлик меҳмон бироз қизишиб жавоб қайтарди: «Сизни ғалаба билан табриклайман! Лекин ака, бундай савол берманг, ичим ёниб кетяпти.
Ўйин тугади. Янги баҳсни кутамиз. Ойнинг ўн беши ёруғ, ўн беши қоронғу...». «Навбаҳор» мухлиси меҳмоннинг елкасига қоқди ва унга оқ йўл тилади.
Ҳа, ҳаммаси тушунарли. «Интрига»сиз, баҳс-мунозараларсиз, тарафкашликсиз футболнинг қизиғи йўқ. Мағлубият алами боис, кўзлардан ёш тирқиратган, ғалаба онларида осмонларга олиб чиққани учун ҳам футбол спорт ўйинлари подшоси ҳисобланади.
Сўзимиз аввалида «МЮ» - «Ливерпуль» учрашувини бежиз эсламадик. «Навбаҳор» - «Пахтакор» қарама-қаршилиги бугун биз учун шундай мақомда. Балки ундан ҳам юқорироқ аҳамиятга эгадир. ХЧК ўйинлари узоқ ўлкаларда гуллаб-яшнайверсин. Бизга ҳозирча «лочинлар» ва «шерлар»нинг шундоқ кўз ўнгимиздаги ўзаро муросасиз курашлари муҳимроқ, қадрлироқ.
Яқиндагина бир-бири билан баҳслашаётган наманганлик, фарғоналик, қўқонлик, андижонлик мухлисларни «Навбаҳор» - «Пахтакор» учрашуви бирлаштирди. Демак, футболимизда янгича мақомдаги рақобат шаклланмоқда. Собиқ иттифоқ даврида «Пахтакор» Москва клубларига қарши ўзгача руҳда тўп сурарди.
Ўша донгдор «Спартак», «Динамо» К., «Торпедо», «Локомотив» каби клублар «Пахтакор» стадионида тўлқинланаётган 40-60 минг кишилик мухлислар дарёси шаштидан ҳаяжонланарди, ҳайиқарди. Назаримизда, энди шундай миссия Наманганга кўчди. «Навбаҳор» ўз майдонида пойтахтнинг ҳар 3та клубини енгди.
Гарчи сафарда «Пахтакор»га ҳам, «Локомотив» ва «Бунёдкор»га ҳам имконият бой берилган бўлсада, наманганлик мухлислар пойтахтимиздаги учрашувларда қизиқарли кечишига муносиб ҳисса қўшишди. Илҳом Мўминжонов «Бунёдкор» - «Навбаҳор» баҳсини томоша қилиш учун Тошкентга борган «Навбаҳор» мухлисларига бежиз миннатдорчилик билдирмади, ахир.
Зеро, бошқа жамоаларда мухлисларнинг пойтахтга оқими бу даражада кузатилмайди. «Миллий» стадионидан мағлубият алангасида ёниб чиқиб, Қамчиқ довонида юксакликка боққан мухлислар армиясини фақат «Пахтакор» устидан қозониладиган ғалабагина тинчлантирарди.
Ўйиннинг мақоми ва аҳамиятини шундан ҳам билиш мумкинки, «шерлар»нинг Ғуломжон Ҳамидов, Эргашбой Йўлдошев, Тўлқинжон Миралиев, Абдували Абдураҳимов каби жонкуяр мухлислари бир кун аввал Наманганга етиб келишди. «Навбаҳор» стадиони 15-секторига кириш жойида пойтахтликлар кайфиятига разм соламиз.
InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.
