«Насаф» – «Бунёдкор» учрашувидан сўнг Рўзиқул Бердиев ўйин ҳақидаги фикрлари билан ўртоқлашди.

“Учрашувда кучли жамоа ғалаба қозонди. «Бунёдкор» бизга нисбатан анча кучли ўйин кўрсатди. Рақибимиз хақли ғалабага эришди. Агар биз пеналтини аниқ амалга оширганимизда, балки ўйинни ўз тарафамизга оғдирган бўлардик. Афсуски бу амалга ошмади. Кейин қизил карточка орқали ҳимоячимиз майдондан четлатилди, бу ҳам ўйинимизга салбий таъсирини кўрсатди. Бундан ташқари ҳимоячимиз Ғолиб Ғайбуллаевни ҳам бошидан олган жароҳати туфайли мажбурий алмаштирдик.

«Бунёдкор» юзага келган вазиятлардан унумли фойдалана олди. Албатта, биз ўз олдимизга кучли олтиликка киришни мақсад қилган эдик, афсуски буни бажара олмадик. Биз ҳам мухлислар ҳам бундай ҳолатга тайёр бўлишимиз керак. Ўзингизга маълум, бизни чемпионлик даражасидаги футболчилар таркибимиздан кетишди. Аммо шундай кейин ҳам биздан муъжиза кутишди, бу бажарилиши қийин бўлган вазифа эди. Бунга эриша олмадик.

Ўйинларда кўплаб вазиятлар яратаяпмиз, аммо ўйинчиларимизда тажриба етишмаслиги бизга панд бераяпти. Вазиятларни голга айлантиришда катта тажриба талаб этилади. Таркибимизда ҳаракат қилаётган футболчиларимизга бундай учрашувлар тажриба мактаби бўлиши аниқ. Уларда келажак бор”, дейди Бердиев.