Аввалги йиллардан анча ўзгача тарзда ўтказилаётган PEPSI Суперлига баҳсларида биринчи босқич якунланди.
Жамоалар энди 6 тадан 2 та гуруҳга ажратилади. Дастлабки гуруҳ чемпионат медаллари учун кураш олиб борса, иккинчи олтиталик Суперлигада жон сақлаб қолиш учун баҳс юритади. Жамоалар энди ўз гуруҳи доирасида уй-сафар тизимида жами 10 та учрашув ўтказишади.
Жон сақлаш йўлида охирги ўринни олган жамоа Про лигага йўл олади. Жон сақлаш йўлида 4 ва 5-ўринни эгаллайдиган клублар эса ўтиш ўйинларида қатнашади.
Дастлабки босқич якунларига кўра, Олмалиқнинг АГМК жамоаси юқори олтиликдан жой ола билмади ва эндиликда Суперлигада қолиш учун баҳсларга киришади. Биринчи босқич якунлари хусусида АГМК жамоаси сардори Лутфулла Тўраев ПФЛ расмий сайтига интервью берди.
- Миллий чемпионатимиз жорий йилдан бошлаб ўзгача ном олди, янгича тартибда ўтказилмоқда. Ҳозирги PEPSI Суперлиганинг аввалги Олий лигадан қандай фарқли жиҳатлари сизнинг эътиборингизни тортди?
- Бу йил мавсум бошидан миллий чемпионатимизда ўзгаришлар, янгиликлар кўп бўлди. Эндиликда ички чемпионатимиз PEPSI Суперлига дея номланмоқда. Унда аввалгидан фарқли равишда 12 та жамоа иштирок этмоқда. Бу эса бутун футболимиз жамоатчилиги учун ўзига хос янгилик бўлди. Айниқса, чемпионатнинг икки босқичга бўлиниши ва жамоаларнинг биринчи босқичдаги натижаларига қараб 2 та гуруҳга ажратилиши кўпчиликнинг эътиборини тортди.
- Миллий чемпионатимиз савияси ўсмоқда, деган фикрга қўшиласизми?
- Албатта. Эътибор берсангиз, Суперлигадаги клублар дастлаб саралаб олинди ва якунда талабларга жавоб берган 12 та клуб элитада қолдирилди. Энди ўша жамоалар бир-бири билан баҳс юритмоқда. Ўйинлар шиддати чиндан ҳам ортди. Зеро жамоалар биринчи босқич давомида кучли олтиликка кириш учун жуда жиддий кураш олиб боришди. Ҳар бир учрашувда очко учун кураш олиб борилди. Натижада рақобат анча ўсди, деб ўйлайман.
- Ўзгаришлар фақат ўйин борасидаги рақобатда кўзга ташланяптими?
- Барча жабҳада ҳам ўзгаришлар бор. Айниқса, ташкилий жиҳатдан янгиликлар киши эътиборини дарҳол тортади. Ўйин ва унинг атрофидаги турли тадбирлар, ўйин олди концерт дастурлари, ўйиндан кейинги махсус ҳудуддаги интервью жараёнлари, учрашувларнинг деярли барчаси ТВда кўрсатилаётганини ижобий баҳолаш мумкин. Бу эса футболга жамоатчилик қизиқиши ва эътиборини оширишда жуда муҳим роль ўйнаётганини кўриб турибмиз. Мухлисларнинг стадионларга ташрифи анча кўпайди. Бу эса биз футболчиларни ҳам хурсанд қиляпти.
- Лекин АГМК жамоаси дастлабки босқич якунланганидан сўнг чемпионлик учун эмас, балки Суперлигада қолиш учун кураш олиб бориши ойдинлашди…
- Афсуски, шундай. Бизга аксарият учрашувларда кутилмаганда очко йўқотганимиз панд берди. Айниқса, биринчи босқичнинг иккинчи давраси аввалида кўп ўйинларда имкониятни бой бердик ва якунда шу ҳолат мусобақа жадвалидаги ўрнимизга таъсир ўтказди. На илож, энди иккинчи олтиталикда Суперлигада қолиш учун баҳс юритамиз. Жамоамиз иккинчи босқичда ўз гуруҳида 1-ўринни банд этиш учун кураш олиб боради. Насиб бўлса, мухлисларимизни иккинчи босқичда кўплаб ғалабалар билан хурсанд этишга ҳаракат қиламиз.
АГМК матбуот хизмати билан ҳамкорликда тайёрланди.
