Ўзбекистон U-16 аёллар терма жамоаси Шри-Ланкада бўлиб ўтадиган Осиё чемпионатининг дастлабки саралаш босқичида қатнашиши ҳақида аввал хабар бериб ўтгандик.

Илҳом Ханжариев бошчилигидаги футболчи қизлар 8 сентябрдан бошлаб Тошкентдаги “Чиғатой” йиғин ўтказишмоқда. Йиғин давомида назарий ва амалий машғулотлар олиб бориляпти. Бугун Ўзбекистон U-16 аёллар терма жамоаси “Бунёдкор-2005” жамоасига қарши назорат учрашуви ўтказди. Ўйин терма жамоанинг 3:2 ҳисобидаги ғалабаси билан якунига етди.

Ушбу ўйин Ўзбекистон U-16 аёллар терма жамоаси учун Осиё чемпионати саралаши олдидан сўнгги тайёргарлик вазифасини ўтаб берди. Эртага тонгда Ўзбекистон U-16 терма жамоаси Тошкент – Куала-Лумпур-Коломбо йўналиши бўйича Шри-Ланкага йўл олади.

Коломбо шаҳрида бўлиб ўтадиган Осиё чемпионати саралашида вакилларимиз Хитой, Гуам, Иордания ва Шри-Ланка терма жамоаларига қарши баҳс олиб боради.

Осиё чемпионатининг дастлабки саралаш босқич яунларига кўра 6та гуруҳда 1-ўрини қўлга киритган жамоалар ва иккита энг яхши кўрсаткичга эга 2-ўрин эгалари кейинги босқичга йўл олади. Ушбу 8та терма жамоа 2019 йилнинг баҳорида Осиё чемпионати саралашининг 2-босқичида иштирок этишади. 2-босқичдан муваффақиятли ўтган 4та терма жамоага ушбу ёш тоифасидаги амалдаги совриндорлар — Япония, Жанубий Корея ва КХДР терма жамоалари ҳамда Осиё чемпионати мезбони (1-саралаш босқичидан кейин маълум бўлади) қўшилади.