Суперлиганинг 23-тури доирасидаги  “Навбаҳор” – “Пахтакор” (3:3) учрашувидан кейинги матбуот анжуманида мезбонлар устози Илҳом Мўминжонов иштирок этган.

"Ҳа, Ўзбекистондаги энг кучли жамоага қарши ўйнадик. Учрашув мухлисларга ёқди, деб ўйлайман. Чунки  улар голлар шоусига гувоҳ бўлишди. Мени хурсанд қилган жиҳат шуки, шогирдларим  ўйиннинг  90 дақиқа давом этишини  тушунишди ва ҳакамнинг сўнгги ҳуштаги чалинишига қадар курашишди.

Мазкур ўйинг танланган тактикамиз иш берди.  Тўғри, дарвозамиздан кўп гол ўтказиб юбордик. “Навбаҳор”да ишлаётганимдан буён  жамоа Наманганда ўз дарвозасидан ҳали 3 марта тўп олиб чиқмаган эди. Аммо рақибимизнинг ҳам “Пахтакор” эканлигини унутмаслик керак. Футболчиларга охиригача курашишгани ва ўйнашгани учун раҳмат айтаман.

Дисквалификация сабабли, 2 нафар футболчимиз:Остон Ўрунов ва Жаҳонгир Меҳмонов майдонга туша олмади. Жамоа сардорини эса футболчилар танлашди. Эндиликда йил охирига қадар жамоани Даврон Ҳошимов сардор сифатида майдонга бошлаб тушади.

Унинг сардорлик ўйини айнан “Пахтакор”га қарши учрашувда бошланди. Ҳошимов тўртинчи сариқ карточкасини олди ва келаси ўйинни ўтказиб юборади. Кейинги баҳсда энди яна бошқа сардорни кўрамиз.

Охирги йилларда “Локомотив” ва “Пахтакор” чемпионлик шоҳсупасидан пастга тушмаяпти. Аммо “Бунёдкор”ни ҳам унутмаслик керак. “Пахтакор” мамлакатимизнинг энг кучли жамоалардан бири.

Чунки ҳар бир футболчининг кўз олдида “Пахтакор” номи жаранглаганда йирик ва кучли жамоа гавдаланади. Суперлиганинг кучли олтилигида кучсиз жамоалар йўқ ва энди осон ўйинлар бўлмайди. Чемпионлик кураши эса давом этади. Биз майдонга қараб ўйнамаймиз, аксинча, рақибдан келиб чиқиб, ўйинни ташкил этамиз", деган Мўминжонов.

“Навбаҳор” ПФК матбуот хизмати