Ўзбекистон кубогида ярим финал йўлланмасини қўлга киритган сўнгги жамоанинг номи аниқ бўлди.

Олмалиқнинг АГМК клуби ўз майдонида қуйи лига жамоаси — "Машъал"ни қабул қилди. Муборакликлар Ашурматов шогирдлари жиддий қаршилик кўрсатишди. Ҳаттоки, қашқадарликлар 58-дақиқада ҳисобни очишга муваффақ бўлишди. Дарвозабон билан яккама-якка вазиятга чиқиб борган Ҳумоюн Муртазоев дарвозани ишғол этди.

Олмалиқликлар ҳисобни тенглаштириш учун анча тер тўкишларига тўғри келди. Баҳс тугашига 11 дақиқа қолганида Камолиддин Мурзоев яқин масофадан меҳмонлар дарвозасини ишғол қилди.

Қўшимча бўлимларда эса АГМК ғалабани илиб кетди. 111-дақиқада Бубанья жамоасини ҳисобда олдинга олиб чиқди. Иккинчи экстра-таймга қўшиб берилган вақтда "Машъал" бурчак тўпини ўйинга киритди ва муборакликлар даврозабони рақиб жарима майдончасига етиб борди. Натижада Жасур Ҳасанов бўш қолган дарвозага жамоасининг учинчи голини киритди ва ўйинга нуқта қўйди.

Шу тариқа, Ўзбекистон кубогининг ярим финалида иштирок этадиган барча жамоалар номи аниқ бўлди: "Қўқон-1912", "Пахтакор", "Бунёдкор", "Машъал". 1/2 финал учрашувлари 27-28 сентябрь кунлари бўлиб ўтиши кўзда тутилган.

Ярим финал жуфтликлари “Спорт” телеканали орқали жонли эфирда намойиш этиладиган “Гол” кўрсатуви вақтида ташланадиган қуръа орқали аниқлаб олинади. Кўрсатув эртага — 20 сентябрь куни 19:40 да бошланади.