Хабарингиз бор, ўзбекистонлик профессионал боксчи Шаҳрам Ғиёсов кеча ўзининг навбатдаги рейтинг жангини ўтказди.
Лондондаги «Уэмбли» стадионида ҳамюртимиз никарагуалик Хулио Лагунага қарши рингга кўтарилди. Рақиб боксчиси профессионал рингда 14та жанг ўтказиб, уларнинг барчасида ғалаба қозонган.
Ғиёсовнинг кучли зарбалари Хулиони аста-секин издан чиқара бошлади. Ниҳоят, тўртинчи раундга келиб ўзбек боксчиси зарбалар сериясидан иборат комбинацияни амалга оширди ҳамда рақибини рингга қулатди.
Ҳакам муддатидан аввал жангни тўхтатишга мажбур бўлди. Эслатиб ўтамиз, бугунги жанг 8 раундга мўлжалланганди. Лагуна дастлабки мағлубиятини қабул қилган бўлса, Ғиёсовнинг ғалабалари 5тага етди: 5та жанг, 5та ғалаба, 4та нокаут.
Шундан сўнг, Шаҳрам ижтимоий тармоқдаги саҳифасида видео чиқиш қилиб, “Уэмбли”даги ғалабасини Ўзбекистон халқига бағишлади.
