Аввалроқ Ўзбекистон Миллий олимпия қўмитаси Бош котиби Жасур Матчанов Аргентинада ўсмирлар ўртасидаги III ёзги Олимпия ўйинлари мусобақаси олдидан бир қатор муҳим шахслар билан учрашгани ҳақида хабар берган эдик.
МОҚ Бош котиби «Olympism in action» («Олимпизм ҳаракатда») форумида Осиё Олимпия Кенгаши ва Миллий олимпия қўмиталари ассоциацияси президенти Шайх Аҳмад ал Фаҳад ал Сабах билан учрашув ўтказди.
МОҚ Матбуот хизматининг маълум қилишича, томонлар учрашувда 2030 йилги Осиё ўйинларини Ўзбекистонда ўтказиш масаласини муҳокама қилган. Ал Сабах яқин вақтлар ичида Ўзбекистонга келади ва бу мавзу бўйича алоҳида учрашув ташкил қилади.
Шунингдек, Жасур Матчанов Халқаро Олимпия қўмитаси Президенти Томас Бах билан ҳам учрашиб, Ўзбекистоннинг ХОҚ форумларига, нуфузли тадбирларига мезбонлик қилиш имкониятлари ҳам кўриб чиқиш масаласини муҳокама қилган.
Эслатиб ўтамиз, 2018 йилги Осиё ўйинлари Индонезия мамлакатида ўтказилди. Унда Ўзбекистон спорт делегацияси нуфузли 5-ўринни эгаллади ва тарихида биринчи марта шундай юқори натижани қайд этди.
