6 октябрь куни Индонезиянинг Жакарта шаҳрида III ёзги Параосиё ўйинлари старт олган эди.

Мазкур ўйинлар ўзбекистонлик спортчилар учун ҳар қачонгидан ҳам муваффақиятли якунланди.

Ўзбекистон спорт делегацияси мусобақада 54 нафар спортчи билан иштирок этиб, 77 та медаль билан қайтадиган бўлди.

Уларнинг 35 таси олтин, 24 таси кумуш ва 18 таси бронза медалларидир. Мазкур ўйинлар Ўзбекистон учун Параосиё ўйинларидаги энг яхшиси сифатида тарихга кирди.

Чунки, бунгача юртдошларимиз ушбу ўйинларда бу қадар кўп медаллар жамғара олишмаган. Ортда қолаётган ўйинларда медаллар сифати бўйича ҳам, сони бўйича ҳам рекорд ўрнатилди.

Эндиликда ўзбекистонлик спортчиларнинг Тошкентга қачон қайтиб келиши ҳақида ҳам маълумот берилди. Унга кўра, спортчилар жойлашган самолёт 15 октябрь куни соат 20:20 да Тошкентга қўнади.