УЕФА миллатлар лигасининг 4-тури доирасида Испания ва Англия терма жамоалари Севилья шаҳрида тўқнаш келишди ва унда инглизлар 3:2 ҳисобида ғалаба қозонишди.
Мезбонлар ҳужумчиси Пако Алькасер учрашувнинг 57-дақиқада майдонга тушиб, орадан 1 дақиқа ўтар-ўтмас жамоасининг илк голига муаллифлик қилди.
Ушбу гол Дортмунднинг "Боруссия" клуби футболчиси учун барча мусобақалар доирасида мавсумдаги 10-гол бўлди. Эътиборли томони, у рақиблар дарвозаси томон 10та зарба бериб, уларнинг барчасини голга айлантиришга муваффақ бўлди. У ўз голларини атиги 6та ўйинда урган.
«Боруссия» август ойида Алькасерни «Барселона»дан 2 миллион евро эвазига бир йилга ижарага олганди. Дортмундликлар 25 миллион евро тўлаб, ҳужумчининг трансфер ҳуқуқини тўлиқ сотиб олишни кўзлашмоқда.