UYEFA millatlar ligasining 4-turi doirasida Ispaniya va Angliya terma jamoalari Sevilya shahrida to‘qnash kelishdi va unda inglizlar 3:2 hisobida g‘alaba qozonishdi.
Mezbonlar hujumchisi Pako Alkaser uchrashuvning 57-daqiqada maydonga tushib, oradan 1 daqiqa o‘tar-o‘tmas jamoasining ilk goliga mualliflik qildi.
Ushbu gol Dortmundning "Borussiya" klubi futbolchisi uchun barcha musobaqalar doirasida mavsumdagi 10-gol bo‘ldi. E’tiborli tomoni, u raqiblar darvozasi tomon 10ta zarba berib, ularning barchasini golga aylantirishga muvaffaq bo‘ldi. U o‘z gollarini atigi 6ta o‘yinda urgan.
«Borussiya» avgust oyida Alkaserni «Barselona»dan 2 million yevro evaziga bir yilga ijaraga olgandi. Dortmundliklar 25 million yevro to‘lab, hujumchining transfer huquqini to‘liq sotib olishni ko‘zlashmoqda.