Кеча “Бунёдкор” академияси майдонида Ёшлар Лигасининг 27-тури доирасида “Бунёдкор” ёшлари “Пахтакор”ни қабул қилишди.

Учрашувнинг илк дақиқасидаёқ "қалдирғочлар" ташаббусни ўз қўлларига олишди ва дастлабки ҳужумдаёқ рақиб дарвозасини ишғол қилишди. Миржаҳон Мирахмадовнинг пасидан сўнг дарвозабон билан бирга-бир чиқиб борган Расул Йўлдошев 2-дақиқадаёқ Лобанов дарвозасини ишғол қилди.

Голдан руҳланган “Бунёдкор” ёшлари ҳужумга зўр беришди ва 4-дақиқада пенальти тепиш имкониятинт қўлга киритишди. Лекин афсуски пенальтидан зарбани амалга оширган Ислом Қобиловнинг зарбасини Лобанов қайтарди. Шундан сўнг ўйин тенг курашлар остида ўта бошлади. Биринчи бўлим якунланишига оз қолганда "Пахтакор" аъзоси Эркинов дарвозамизни ишғол этиб ҳисобни тенглаштирди.

Иккинчи бўлимда ҳам томонлар бир нечта имкониятларга эга бўлганига қарамай, тайм охирларига қадар дарвозалар даҳлсиз қолди. Учрашувнинг 88-дақиқасига келибгина Миржаҳон Мирахмадов Лобанов дарвозасига “қалдирғочлар”га ғалаба келтирувчи гол муаллифиги айланди. Шундан сўнг дарвозаларга гол киритилмади ва учрашув Шуҳрат Мақсудов шогирдларининг ғалабаси билан якунланди. Якуний ҳисоб 2-1!