Про-лига мусобақаларининг “А” гуруҳидаги 35-тур учрашувини “Андижон” клуби мухлислари ўзгача руҳда кутдилар.
Чунки, 13 ноябрь куни бўлиб ўтадиган баҳсда “Андижон” клуби «Истиқлол»дан устун келса “Андижон” сўнгги турда қандай натижа қайд этишидан қатъи назар, 1-ўринни эгаллаши аниқ эди.
Гуруҳда 2-поғонада бораётган «Машъал» эса «Андижон»дан 3 очко ортда бўлиб, ўзаро ўйинлар натижасига кўра, муборакликлар сўнгги турдан кейин «Андижон»дан олдинга ўтиб кета олмасди.
“Баркамол авлод” стадионига келган кўп сонли мухлислар ўз жамоасидан фақат ғалаба кутдилар.
“Андижон” клуби биринчи бўлимни ҳужумкор руҳда бошлаган бўлсада, 43-дақиқада меҳмонлар Жавоҳир Расуловнинг голидан сўнг олдинга чиқиб олди. Танаффусдан сўнг ўйин тизгини мезбонлар томонга ўтди. “Андижон” клубидан Нодир Мавлонов(48), Шаҳбоз Жумабоев(56, пенальти)лар биттадан гол киритиб, ўз жамоасини Суперлига олиб чиқишди. Якунда ҳисоб 2:1 кўринишида қолди.
Ўйиндан сўнг бўлиб ўтган тантанали тадбирда вилоят ҳокими Шуҳратбек Абдураҳмонов, Ўзбекистон Профессионал футбол лигаси бош директори Омон Ғофуров ва бошқа мутасаддилар иштирок этишди. Шуҳратбек Абдураҳмонов "Андижон" клуби аъзоларининг ҳар бирига 10 миллион сўмдан мукофот ҳамда бош мураббий Илдар Сакаев ва Шаҳбоз Жумабоевга "Кобальт" автомашинаси калитини топширди.
