Pro-liga musobaqalarining “A” guruhidagi 35-tur uchrashuvini “Andijon” klubi muxlislari o‘zgacha ruhda kutdilar. 

Chunki, 13 noyabr kuni bo‘lib o‘tadigan bahsda “Andijon” klubi «Istiqlol»dan ustun kelsa “Andijon” so‘nggi turda qanday natija qayd etishidan qat’i nazar, 1-o‘rinni egallashi aniq edi.

Guruhda 2-pog‘onada borayotgan «Mash’al»  esa «Andijon»dan 3 ochko ortda bo‘lib, o‘zaro o‘yinlar natijasiga ko‘ra, muborakliklar so‘nggi turdan keyin «Andijon»dan oldinga o‘tib keta olmasdi.

“Barkamol avlod” stadioniga kelgan ko‘p sonli muxlislar o‘z jamoasidan faqat g‘alaba kutdilar.

“Andijon” klubi birinchi bo‘limni hujumkor ruhda boshlagan bo‘lsada, 43-daqiqada  mehmonlar Javohir Rasulovning golidan so‘ng oldinga chiqib oldi. Tanaffusdan so‘ng o‘yin tizgini mezbonlar tomonga o‘tdi. “Andijon” klubidan Nodir Mavlonov(48), Shahboz Jumaboyev(56, penalti)lar bittadan gol kiritib, o‘z jamoasini  Superliga olib chiqishdi. Yakunda hisob 2:1 ko‘rinishida qoldi.    

O‘yindan so‘ng bo‘lib o‘tgan tantanali tadbirda viloyat hokimi  Shuhratbek Abdurahmonov, O‘zbekiston Professional futbol ligasi bosh direktori Omon G‘ofurov va boshqa mutasaddilar ishtirok etishdi. Shuhratbek Abdurahmonov "Andijon" klubi a’zolarining har biriga 10 million so‘mdan mukofot hamda bosh murabbiy Ildar Sakayev va Shahboz Jumaboyevga "Kobalt" avtomashinasi kalitini topshirdi.