Германия терма жамоаси Миллатлар лигасини ғалабасиз тарзда якунлади.
Жамоа сўнгги турда Нидерландияни қабул қилиб, 2:0 ҳисобидаги ғалабани бой берди; ўйин сўнггида иккита гол ўтказиб юбориб, иккинчи дурангини қайд этди.
Бундестим кетма-кет 5та расмий учрашувдан буён ғалаба нималигини билмай келмоқда. Бундай ҳолат терма жамоа тарихида кейинги 40 йил давомида илк марта кузатиляпти. 1978-79 йилларда немислар 6та расмий баҳсдан иборат ғалабасиз серия қайд этган.
Йоахим Лёв жамоаси охирги марта ЖЧ-2018 гуруҳ босқичида Швеция устидан ғалаба қозонганди. Шу билан бирга, кечаги ўйиннинг 9-дақиқасида ҳисобни очган Тимо Вернер Германия термасининг 8 ўйинга чўзилган голсиз сериясига барҳам берди.
Германияликлар жами 751 дақиқа давомида рақиб дарвозасини ишғол эта олмай келаётганди.
Яна бир статистик маълумотга кўра, «Бавария» ҳужумчиси Томас Мюллер Нидерландияга қарши учрашувда майдонга тушиб, терма жамоадаги ўйинлари сонини 100тага етказди. 29 ёшли футболчи 67-дақиқада Сержа Гнабрининг ўрнига захирадан ўйинга қўшилди. У 100та баҳсда 38та гол уриб, 36та голга ассистентлик қилган.
Эндиликда Бундестим сафида юзлик довонни забт этган футболчилар сони 15тага етди. Гвардиячилар рўйхатини 150та учрашувда қатнашган Лотар Маттеус бошқариб бормоқда. Кучли учликда Мирослав Клозе (137) ва Лукас Подольски ҳам бор.
